کراچی(این این آئی)شہرقائد میں امریکی سفارت خانے کی گاڑی کی ٹکر سے موٹر سائیکل سوار زخمی ہوگیا،گاڑی غیرملکی خاتون چلا رہی تھیں، حادثہ پی آئی ڈی سی بلڈنگ کے قریب پیش آیا، حادثے کے بعد لوگوں نے قونصلیٹ کی گاڑی کو گھیرے میں لے لیا جبکہ زخمی شخص کو طبی امداد کے لیے اسپتال منتقل کردیا گیا۔پولیس کے مطابق امریکی قونصلیٹ کی گاڑی غیرملکی خاتون چلا رہی تھیں، خاتون امریکی قونصل خانے میں اسٹاف ممبر ہیں، گاڑی کا نمبر کیو ایم 942 ہے، جبکہ تحقیقات کررہے ہیں کہ حادثہ کس طرح پیش آیا۔ حادثے
کے نتیجے میں زخمی ہونے والے شخص کو اسپتال منتقل کردیا گیا، ریسکیو ذرائع کے مطابق زخمی شخص کے پاؤں میں چوٹیں آئی ہیں۔اس ضمن میں ایس پی صدر ڈویژن عبداللہ احمد نے بتایا کہ حادثہ امریکی قونصلیٹ کی گاڑی کی ٹکر سے ہی پیش آیا۔ گاڑی میں سوار خاتون امریکی قونصلیٹ کی ملازمہ ہیں۔انہوں نے بتایا کہ گاڑی کے بریک فیل ہونے کے باعث پل اترتے ہوئے موٹر سائیکل سوار کو ٹکر لگی جس کے باعث موٹر سائیکل سوارکے پیر میں معمولی چوٹ آئی تاہم یو ایس قونصلیٹ کی گاڑی کو تحویل میں لے لیا گیا ہے۔
