کراچی (مانیٹرنگ ڈیسک) روپے کے مقابلے میں ڈالر مزید مہنگا ہو گیا، ایک نجی ٹی وی چینل کی رپورٹ کے مطابق پاکستان میں امریکی ڈالر کی قیمت میں ایک بار پھر اضافہ ریکارڈ کیا گیا ہے۔ پاکستانی کرنسی کی قدر میں ڈالر کے مقابلے میں کمی کا سلسلہ جاری ہے، آج ایک بار پھر مارکیٹ میں امریکی ڈالر کی قیمت میں اضافہ دیکھنے میں آیا، رپورٹ کے مطابق انٹر بینک مارکیٹ میں ڈالر ایک روپے 32 پیسے مہنگا ہونے کہ بعد 133 روپے 25 پیسے
کی سطح پر بند ہوا جبکہ اوپن مارکیٹ میں ڈالر کی قدر میں ایک روپے 50 پیسے اضافہ ہوا، جس کے بعد عام عوام کے لیے ڈالر 133 روپے 50 پیسے کا ہوگیا۔ معاشی ماہرین کا اس حوالے سے کہا ہے کہ ڈالر کی تیزی سے بڑھتی ہوئی قیمت پاکستانی معیشت کے استحکام کے لیے بہت خطرناک ہے، معاشی ماہرین کا کہنا ہے کہ اگر ڈالر کی قیمت کو فوری طور پر کنٹرول نہ کیا گیا تو آنے والے دنوں میں ملک میں مہنگائی کا نیا سیلاب آنے کا خطرہ ہے۔
