لاہور (مانیٹرنگ ڈیسک) مسلم لیگ (ن) کے صدر شہباز شریف کی آشیانہ ہاؤسنگ سکینڈل میں گرفتاری کے بعد لیگی رہنما خواجہ سعد رفیق اور ان کے بھائی سلمان رفیق کا نام ای سی ایل میں ڈال دیا گیا ہے، ایک نجی ٹی وی چینل کی رپورٹ کے مطابق دونوں بھائیوں کو 16 اکتوبر کو نیب کے روبرو پیش ہونے کا کہا گیا ہے، اس کے علاوہ لاہور نیب نے انہیں اپنے ہمراہ منی ٹریل لانے کی بھی ہدایت کی ہے۔
دونوں بھائیوں کے خلاف پیرا گون ہاؤسنگ سکیم کے حوالے سے تحقیقات جاری ہیں اور اسی سلسلے میں خواجہ سعد رفیق اور سلمان رفیق کو ایک بار پھر نیب نے طلب کیا ہے۔ یاد رہے کہ ن لیگ کے ٹکٹ پر خواجہ سعد رفیق لاہور کے حلقہ این اے131 سے ضمنی انتخاب میں بھی حصہ لے رہے ہیں۔رپورٹ میں بتایا گیا کہ دونوں بھائیوں کو نیب نے گزشتہ جمعہ کو بھی بلایا تھا مگر انہوں نے الیکشن مصروفیت کی وجہ سے پیش ہونے سے معذرت کر لی تھی، خواجہ سعد رفیق کے قریبی دوست قیصر امین بٹ کو یکم اکتوبر کو پیراگون سٹی کرپشن کیس میں نیب لاہور نے گرفتار کرلیا تھا، خواجہ سعد کے دوست قیصر امین بٹ پیراگون سٹی کے چیئرمین اور حصے دار ہیں، نیب ذرائع کا کہنا ہے کہ پیراگون سٹی آشیانہ ہاؤسنگ کی بینیفشری ہے۔ دوسری جانب مسلم لیگ (ن) کی رہنما عظمیٰ بخاری نے کہا ہے کہ حکومت کے سامنے ضمنی الیکشن بھی عام انتخابات کی طرح ہوگیا، شہباز شریف کو 25 جولائی کے اسکرپٹ پر گرفتار کیا گیا، ان کو صاف پانی کیلئے بلا کر آشیانہ کیس میں گرفتار کیا گیا، سعد رفیق کو بھی نیب نے طلب کیا ہے ۔ جمعہ کو رہنما مسلم لیگ (ن) عظمیٰ بخاری نے شہباز شریف کی گرفتاری پر ردعمل دیتے ہوئے کہا کہ شہباز شریف کو 25جولائی کے اسکرپٹ پر گرفتار کیا گیا،ضمنی الیکشن عام انتخابات کی طرح اہم ہوگیا، شہباز شریف کو صاف پانی کیلئے بلا کر آشیانہ کیس میں گرفتار کیا گیا۔ نیب نے سعد رفیق کو بھی بلایا ہے اب ان کو بھی گرفتار کیا جا سکتا ہے ۔
