لاہور ( این این آئی) پہلی بار وزارت عظمیٰ کی ذمہ داریاں سنبھالنے والے عمران خان نے گزشتہ روز 5 اکتوبر کو پہلی بار اس منصب پر رہتے ہوئے اپنی سالگرہ منائی۔عمران خان کی 66 ویں سالگرہ پر جہاں انہیں انٹرنیشنل کرکٹ کانسل (آئی سی سی)کی جانب سے مبارکباد پیش کی گئی، وہیں انہیں پاکستان کرکٹ بورڈ کی جانب سے بھی مبارکباد پیش کی گئی۔پاکستان میں ٹوئٹر پر 5اکتوبر کو وزیر اعظم کی سالگرہ کے حوالے سے ٹرینڈ بھی ٹاپ پر رہا تاہم بعد ازاں

اپوزیشن لیڈر شہباز شریف کی گرفتاری ٹاپ ٹرینڈ بن گیا۔وزیراعظم عمران خان کو نہ صرف پارٹی رہنماؤں، حکومتی وزراء بلکہ عام افراد نے بھی ٹوئٹر پر مبارک باد پیش کی، علاوہ ازیں بعض ٹی وی چینلز نے بھی ان کی سالگرہ کی خبر بریکنگ نیوز کے طور پر نشر کی۔انہیں پاکستان تحریک انصاف کے آفیشل ٹوئٹر ہینڈل سے بھی سالگرہ کی مبارک باد پیش کی گئی، علاوہ ازیں دیگر سیاسی جماعتوں کے رہنماؤں نے بھی ان کے لیے نیک خواہشات کا اظہار کیا۔