اسلام آباد (آئی این پی)سپریم کورٹ نے قبضہ گروپ منشا بم کے سفارش کرانے سے متعلق میں ملک کرامت کھوکھر اور ندیم بارا کی معافی قبول کرتے ہوئے پی ٹی آئی کو دونوں رہنماؤں کے خلاف انضباطی کاروائی کا حکم دے دیا، چیف جسٹس ثاقب نثار نے کہا کہ دیکھیں آئندہ ایسا نہ ہو، پی ٹی آئی دیکھے اس کے رہنما جرائم پیشہ افراد کی حمایت کرتے ہیں۔ پیر کو سپریم کورٹ میں قبضہ گروپ منشا بم کے سفارش کرانے سے متعلق کیس کی سماعت ہوئی،
پنجاب پولیس نے بتایا کہ منشا بم کو تلاش کر رہے ہیں،ملا نہیں، مختلف مقامات پرچھاپے مار رہے ہیں، ایم این اے کرامت کھوکھر نے استدعا کی کہ غلطی ہو گئی معافی دے دی جائے، چیف جسٹس ثاقب نثار نے کہا کہ دیکھیں آئندہ ایسا نہ ہو، ہم قانون سازوں کا احترام کرتے ہیں، سپریم کورٹ نے کرامت کھوکھر اور ندیم بارا کی معافی قبول کرلی، سپریم کورٹ میں کرامت کھوکھر اور ندیم بارا نے آئندہ پولیس پر اثرانداز نہ ہونے کا وعدہ کرلیا، عدالت نے پی ٹی آئی کو دونوں رہنماؤں کے خلاف انضباطی کاروائی کاحکم دے دیا۔ چیف جسٹس نے کہا کہ پی ٹی آئی دیکھے اس کے رہنما جرائم پیشہ افراد کی حمایت کرتے ہیں، عدالت نے منشا بم کے چاروں بیٹوں کے نام ای سی ایل میں ڈالنے کا حکم دے دیا۔عدالت نے حکم دیا کہ جن لوگوں کی زمینوں پر قبضے ہوئے ہیں انہیں واپس کی جائیں، چیف جسٹس نے ریمارکس دیئے کہ ویسے وزیراعلیٰ ہمارے پیچھے پیچھے چلتے ہیں، چیف جسٹس نے کہا کہ وزیراعلیٰ پنجاب نے کہا قبضہ گروپ کے خلاف کارروائی کریں گے، وزیراعلیٰ پنجاب کا بیان خوش آئند ہے، بیرون ملک پاکستانی اس ملک سے بہت پیار کرتے ہیں، عدالت نے کرامت کھوکھر اور ندیم بارا کو تحریری معافی نامہ دینے کا حکم دے دیا، پنجاب پولیس نے بتایا کہ منشا بم بہت بڑا مافیا ہے۔ چیف جسٹس نے کہا کہ جس کی زمینوں پر قبضے کئے گئے واگزار کرائیں، جن زمینوں پر حکم امتناع لیا ہوا ہے وہ فہرست ہمیں دیں، سوچ رہا ہوں معاملہ وزیراعظم کو بھجوا دوں۔
