اسلام آباد (نیوز ڈیسک) سعودی عرب نے پاکستان کے تین بڑے منصوبوں کے اخراجات اٹھانے کا وعدہ کر لیا، ایک موقر قومی اخبار نے اپنی رپورٹ میں لکھا ہے کہ سعودی حکومت نے جن تین منصوبوں کے لیے گرانٹس دینے کا وعدہ کیا ہے وہ سی پیک کے تحت بننے والے انفراسٹرکچر اور توانائی کے منصوبے ہیں۔ گزشتہ روز پریس کانفرنس میں اس حوالے سے وزیر اطلاعات فواد چودھری نے بتایا کہ ان تین منصوبوں کے لیے گرانٹس دینے کے معاہدوں پر بھی دستخط ہو چکے ہیں۔انہوں نے پریس کانفرنس کے دوران بتایا کہ ان گرانٹس کی مالیت کے حوالے سے جلد قوم کو

آگاہ کر دیا جائے گا۔ انہوں نے کہا کہ یہ انتہائی مثبت قدم ہے جو پاکستان اور سعودی عرب کے دوستانہ تعلقات کی غمازی کرتا ہے۔ انہوں نے بتایا کہ سعودی عرب کا ایک اعلیٰ سطحی وفد آئندہ ہفتے پاکستان کا دورہ کرے گا جس میں سعودی سرمایہ کاری ٹیم اور وزراء برائے پٹرولیم اور توانائی شامل ہوں گے۔ اس موقع پر دونوں ملکوں کے درمیان مزید کئی معاہدے بھی ہوں گے۔ وزیر اطلاعات نے بتایا کہ آئندہ طے پانے والے پاک سعودی معاہدوں میں ریکوڈک کے سونے اورتانبے کے ذخائر کی نکاسی اور گوادر بندرگاہ پر ریفائنری کے قیام کے معاہدے بھی شامل ہوں گے۔

موضوعات:اخراجات اٹھانے کا وعدہ