کراچی(نیوز ڈیسک)کراچی کے علاقے صفورا چورنگی کے قریب بس پر حملے کی نجی اسپتال میں زیرعلاج کی ایک زخمی خاتون جمعرات کی صبح زخموں کی تاب نہ لاکر دم توڑ گئیں،جس کے بعد جاں بحق افراد کی تعداد 46ہوگئی ہے جبکہ مختلف اسپتالوں میں 12 زخمی زیرعلاج ہیںِ، 5کی حالت تشویش ناک بتائی جاتی ہے۔تفصیلات کے مطابق سانحہ صفوراچورنگی کی ایک اور زخمی نفیسہ فاروق نامی خاتون نجی اسپتال میں جمعرات کی صبح زخموں کی تاب نہ لاکرچل بسیں۔نفیسہ فاروق کو انتہائی تشویش ناک حالت میں اسٹیڈیم روڈ پر واقع نجی اسپتال منتقل کیا گیا تھا، اسی اسپتال میں زیر علاج مزید پانچ زخمیوں کی حالت تشویش ناک ہے، ڈاکٹرز کے مطابق تمام افراد کو سر اور جسم کے بالائی حصے میں گولیاں لگی ہیں جبکہ مزید 7افراد میمن اسپتال میں زیرعلاج ہیں جن کی حالت خطرے سے باہر بتائی جا رہی ہے، زخمیوں میں وہ مسافر بھی شامل ہے جو فائرنگ کے بعد بس چلا کر میمن اسپتال لایا تھا۔