ریڈیو پاکستان پر کتنے ارب روپے خرچ کئے جارہے ہیں اور وہ سالانہ کتنے ارب کے نقصان میں جارہاہے؟ حیرت انگیز اعداد و شمار سامنے آگئے  اسلام آباد (این این آئی)وفاقی وزیر برائے اطلاعات و نشریات چوہدری فواد حسین نے کہا ہے کہ ریڈیو پاکستان پر سالانہ 5 ارب روپے خرچ ہو رہے ہیں، ریڈیو کی بہتری کے لئے تجویز پر عمل نہ کیا گیا تو ریڈیو آئندہ پانچ سالوں میں مزید مالی مشکلات کا شکار ہو جائے گا۔

بدھ کو پارلیمنٹ ہاؤس کے باہر گفتگو کرتے ہوئے وفاقی وزیر نے کہاکہ ریڈیو پاکستان سالانہ ایک ارب 25 کروڑ روپے کے نقصان میں جا رہا ہے۔ آئندہ پانچ سالوں میں یہ نقصان 9 ارب تک جا پہنچے گا ۔فواد چوہدری نے کہاکہ ریڈیو کی بہتری کے لئے تجویز دی ہے کہ عمارت کو لیز پر دے کر ریونیو حاصل کیاجاسکے جس سے ریڈیو کی بہتری ہو سکے۔ بعد ازاں ریڈیو پاکستان کے ملازمین سے گفتگو کرتے ہوئے وزیر مملکت علی محمد خان نے کہاکہ ریڈیو پاکستان نے 1965ء کی جنگ میں بڑا کردار ادا کیا ۔ قدرتی آفات کے حوالے سے بھی ریڈیو پاکستان کا کردار نمایاں ہے۔ وفاقی وزیر اطلاعات نے ریڈیو کو مالی مشکلات سے نکالنے کے لئے ایک تجویز پیش کی تھی ۔ انہوں نے اس حوالے یکم نومبر تک تجاویز مانگی تھیں۔ علی محمد خان نے کہاکہ ریڈیو پاکستان سے کسی کو نہیں نکالا جائے گا اور نہ ہی ملازمین کے خلاف کوئی قدم اٹھایاجائے گا۔ ریڈیو کی مزید بہتری کے لئے اقدامات اٹھائے جائیں گے۔ وزیر مملکت نے کہا کہ ریڈیو پاکستان کے نمائندوں سے ملاقات میں یقین دلایا ہے کہ ملازمین کے خلاف کوئی اقدام نہیں اٹھایاجائے گا ۔