سیالکوٹ(آئی این پی)بھارتی آبی جارحیت ،دریائے جموں توی اور نالہ ڈیک میں طغیانی ،دریاؤں اور ندی نالوں کے اطراف میں 600 دیہاتوں کو الرٹ جاری کردیا گیا۔امدادی ٹیمیں روانہ ،دریائے چناب ،دریائے مناور توی، نالہ ایک اور نالہ پلکھو میں بھی پانی کی سطح بلند ہونا شروع، اونچے سے اونچے درجے کے سیلاب کا امکان، جموں توی کنارے آباد 9دیہاتوں کو خالی کروالیا گیا،بجوات کے 85دیہات کا سیالکوٹ سے رابطہ منطقع ہونے کا خدشہ،
تفصیلات کے مطابق پاکستان کے ازلی دشمن بھارت نے پیشگی اطلاع کے بغیر دریائے جموں توی میں ایک لاکھ 44ہزار کیوسک پانی چھوڑدیا ہے جس سے سید پور کے مقام پر اونچے درجے کا سیلاب ہے او ر پانی کی سطح 12ہزار 897کیوسک سے تجاوز کرگئی ہے اور پانی کی سطح مسلسل بلند ہورہی ہے دریائے جموں توی میں خطرناک حد تک پانی چھوڑنے کے باعث مقبوضہ جموں کشمیر اور پاکستانی سرحد کے قریب سے دریاکا پانی اوور فلو کرکے نالہ ایک اور پلکھو میں طغیانی برپا کرسکتا ہے۔ دوسری طرف مقبوضہ جموں کشمیر سے پسرور میں داخل ہونے والے نالہ ڈیک میں اونچے درجے کا سیلاب ہے اور پانی کی آمد 16ہزار 588کیوسک ریکارڈ کی جارہی ہے محکمہ آبپاشی کے مطابق تمام ندی نالوں میں پانی کی سطح مسلسل بلند ہورہی ہے اور دریاؤں کنارے پشتو ں اور بندوں کی نگرانی کے لئے ٹیمیں روانہ کردی گئیں ہیں تاکہ کسی بھی ہنگامی صورتحال سے نمنٹا جاسکے۔ ضلعی حکومت نے دریاؤں اور ندی نالوں کے اطراف میں سیالکوٹ کے 100 ،پسرور کے 150 ،سمبڑیال کے 50 ،ڈسکہ کے 20 دیہاتوں کو الرٹ جاری کردیا ہے۔ اور پانی کی سطح بلند ہونے پر عندیہ دیتے ہوئے اپنے مال مویشی اور بیوی بچوں کو محفوظ مقامات پر منتقل کرنے کی ہدایت کی گئی ہے۔ ہیڈ مرالہ اتھارٹی کے مطابق دریائے چناب میں پانی کی سطح 54ہزا ر 914کیوسک ریکارڈ کی جارہی ہے اور پانی کی سطح ہر لمحہ کئی ہزار کیوسک بلند ہورہی ہے
جبکہ ہیڈ خانکی کو 41ہزار 618کیوسک پانی چھوڑا جارہاہے دریائے چناب میں پانی 14ہزار کیوسک سے بڑھ کر 40ہزار 437کیوسک تک پہنچ گیا ہے۔ نالہ ڈیک میں کنگرہ کے مقام پر پانی کی سطح 16ہزار 588کیوسک ریکارڈ کی جارہی ہے اور بعض مقاما ت پر نالہ ڈیک کا پانی زرعی اراضی کو متاثر کررہا ہے۔ ضلعی انتظامیہ کا کہنا ہے کہ بھارت کی طر ف سے تمام دریاؤں اور ندی نالوں میں پانی چھوڑے جانے کا امکان ہے جس سے تمام ندی نالوں میں اونچے درجے کا سیلاب آنے کے قوی امکانات ہیں۔ جس سے چناب کنارے آباد پنجاب کے دیگر 9اضلاع کو حفاظتی انتظامات مکمل کرنے کا الرٹ جاری کردیا گیا ہے۔
