کراچی(نیوزڈیسک) وزیراعلیٰ سندھ سید قائم علی شاہ نے سخت ترین سیکیورٹی حصار میں صفورا چورنگی پر سانحہ کی جگہ کا دورہ کیا۔ اس موقع پر میڈیا سے گفتگو کرتے ہوئے ان کا کہنا تھا کہ رینجرز اور پولیس کی کارکردگی کسی سے کم نہیں ہے۔ دہشتگردوں کو کیفر کردار تک پہنچا کر دم لیں گے۔ اپنے استعفیٰ دینے کا سوال گول کرتے ہوئے وزیراعلیٰ سندھ نے کہا کہ دہشتگردی کے واقعات تو ہر جگہ ہوتے ہیں۔ ایسے واقعات تو پنجاب اور خیبر پختونخوا میں بھی ہوئے ان سے استعفے کا پوچھا گیا؟۔ جب ہماری کارکردگی نہیں ہوگی تو یقننا استعفی دیں گے۔ انہوں نے اس عزم کا اظہار کیا کہ عوام کو مایوس نہیں ہونے دیں گے اور دہشت گردوں کو نہیں چھوڑیں گے