اسلام آباد (این این آئی) الیکشن کمیشن آف پاکستان کی جانب سے مخصوص نشستوں کا نوٹیفکیشن جاری ہونے کے بعد انتخابات کا آخری مرحلہ بھی مکمل ہوگیا جس کے بعد تمام جماعتوں کی پوزیشن بھی واضح ہو گئی۔الیکشن کمیشن نے مخصوص نشستوں پر کامیاب امیدواروں کا اعلان سیاسی جماعتوں کی جانب سے جمع کرائی گئی ترجیحی فہرست کے مطابق کیا اور ساتھ ہی خواتین اور غیر مسلموں کیلئے مخصوص قومی اور صوبائی اسمبلیوں کی مجموعی 221 نشستوں پر کامیاب ارکان اسمبلی کا نوٹیفکیشن بھی جاری کیا۔قومی اسمبلی
میں خواتین کی 60 مخصوص نشستیں ہیں جبکہ 10 نشستیں اقلیتی ارکان کیلئے مخصوص ہیں اس طرح قومی اسمبلی میں مجموعی طور پر 70 مخصوص نشستوں پر امیدواروں کا نوٹیفکیشن جاری کیاگیا ہے۔دوسری جانب الیکشن کمیشن نے ایک سے زائد نشست پر جیتنے والے کامیاب امیدواروں کو حلف اْٹھانے سے قبل کسی ایک سیٹ کا انتخاب کرکے بقیہ نشستوں کو چھوڑنے کی ہدایت کی ہے ،تاہم نومنتخب کامیاب امیدوار کی جانب سے اپنی نشستیں چھوڑنے کے حوالے سے صوبائی الیکشن کمشنرز کو بھی آگاہ کیا جاسکتا ہے۔
