اسلام آباد (مانیٹرنگ ڈیسک) پاکستان تحریک انصاف عام انتخابات میں کامیابی حاصل کرکے وفاقی حکومت بنانے جا رہی ہے، اس کے علاوہ پنجاب میں بھی متوقع طور پر تحریک انصاف کی حکومت بنتی نظر آ رہی ہے دوسری جانب خیبرپختونخوا میں واضح اکثریت سے تحریک انصاف حکومت بنا رہی ہے۔ تحریک انصاف کی اس جیت کو اپوزیشن جماعتوں نے دھاندلی کا نتیجہ قرار دیا ہے اور بعض حلقوں میں دوبارہ گنتی کا مطالبہ کیا جا رہا ہے،

تحریک انصاف کی جیت کے حوالے سے ایک عالمی خبر رساں ادارے نے ایسی وجہ بتائی ہے جو اس کے مخالفین کے وہم و گمان میں بھی نہیں ہوگا، رائٹرز نے اپنی رپورٹ میں کہا ہے کہ انتخابات میں تحریک انصاف کی جیت کی وجہ ایک ایپلی کیشن تھی جس میں پانچ کروڑ سے زائد ووٹروں کا ڈیٹا موجود تھا، اس ایپلی کیشن اور اس کے ڈیٹابیس کو تحریک انصاف نے انتخابات سے قبل اور انتخابات کے دن ووٹروں کو ٹارگٹ کرنے کے لیے استعمال کیا۔ رپورٹ میں بتایا گیا کہ جب الیکشن کمیشن کی انتخابات کے دن ایس ایم ایس سروس تعطل کا شکار ہوئی، جس کے ذریعے ووٹر اپنے حلقے کی معلومات حاصل کر سکتے تھے، اس وقت تحریک انصاف اس ایپلی کیشن کے ذریعے اپنے حامیوں کو ان کے حلقے کی معلومات دیتی رہی اس طرح تحریک انصاف کے زیادہ سے زیادہ ووٹرز پولنگ سٹیشنز تک پہنچے اور انہوں نے ووٹ کاسٹ کیا۔ رپورٹ میں کہا گیا کہ دوسری جماعتوں کے حامی ووٹر الیکشن کمیشن کی سروس سے اپنے ایس ایم ایس کے جواب کا انتظار ہی کرتے رہ گئے، اس ایپلی کیشن کے منتظم عامر مغل نے بتایا کہ انتخابات سے پہلے بھی اس ایپلی کیشن کا ہمیں بہت فائدہ ہوا لیکن انتخابات کے دن یہ سب سے زیادہ سود مند ثابت ہوئی۔ انہوں نے بتایا کہ 25 جولائی کو 20 لاکھ سے زائد لوگوں نے اس ایپلی کیشن کے ذریعے اپنے پولنگ سٹیشن کے بارے میں معلومات حاصل کیں، رپورٹ میں کہا گیا ہے کہ انتخابات سے قبل تحریک انصاف نے اس ایپلی کیشن کو خفیہ رکھا تاکہ دوسری جماعتیں اس کی نقل تیار کرکے فائدہ نہ اٹھا سکیں۔