اسلام آباد(آن لائن)پاکستان پیپلز پارٹی کے رہنما نبیل گبول نے مسافر پر تشدد کے حوالے سے سوشل میڈیا پر دکھائی گئی ویڈیو پر وضاحت دیتے ہوئے کہا ہے کہ اس مسافر کو جوگالیاں دینے کی آواز ہے وہ میری نہیں ہے البتہ حقیقت یہ ہے کہ یہ مسافر دوبئی ائیر پورٹ پر نشے کی حالت پر پاکستانی سیاستدانوں کو گالیاں دے رہا تھا جہاں پر میں نے اسے سمجھایا کہ دیار غیر میں پاکستان کو بدنام نہ کرو اور میرے ساتھ کچھ اور لوگوں نے بھی اس کو خاموش کرانے کی کوشش کی ۔
بعدازاں دوبئی سے کراچی تک کے سفر میں اس مسافر نے ائیر ہوسٹس سے بھی بدتمیزی کی اور کراچی ائیر پورٹ پر اترنے کے بعد اس شخص نے مجھ پر حملہ کرنے کی کوشش کی اور میری طرف لپکا تو میں نے اسکو پیچھے ہٹایا ۔ اس مسافر کے پیچھے ٹرالی تھی جس کی وجہ سے وہ زمین پر گِر گیا ۔ کراچی ائیر پورٹ پر اس مسافر نے کئی اور لوگوں سے بھی بد تمیزی کی لیکن نہ تو میں نے اسکو گالیاں دیں اور نہ ہی میں نے اسکو مارا ہے اس لئے میں واضح کرنا چاہتا ہوں کہ میرے خلاف پروپیگنڈا بے بنیاد ہے ۔
