کوہاٹ(آن لائن) بونیر سے کراچی جانے والی مسافر بس اور ٹینکر میں خوفناک تصادم کے نتیجے میں 15افراد جاں بحق اور 45زخمی ہو گئے ،پولیس اور امدادی ٹیمیں جائے وقوعہ پر پہنچ گئیں ،زخمیوں کو ڈی ایچ کیو ہسپتال منتقل کردیا گیا ، ہلاکتوں میں اضافے کا خدشہ ظاہرکیا جارہا ہے۔تفصیلات کے مطابق کوہاٹ میں مسافر بس اور ٹینکر کے درمیان خوفناک تصادم ہوا جس کے نتیجے میں بس میں سوار مسافروں میں سے 15 افراد جاں بحق اور 45 زخمی ہوگئے۔

حادثے کی اطلاع ملتے ہی پولیس اور امدادی ٹیمیں جائے وقوعہ پر پہنچ گئیں اور امدادی کارروائیوں میں حصے لیتے ہوئے بس سے لاشوں اور زخمیوں کو نکالا جنہیں قریبی ہسپتال منتقل کیا گیا ۔امدادی کارروائیوں میں مقامی لوگوں نے بھی حصہ لیا ۔پولیس کے مطابق مسافر بس بونیر سے کراچی جارہی تھی جو سماری کے قریب حادثے کا شکار ہوگئی۔ڈپٹی کمشنر نے 13افراد کی ہلاکت کی تصدیق کرتے ہوئے بتایا کہ حادثے میں 20افرادزخمی ہوئے ہیں جن میں خواتین اور بچے بھی شامل ہیں جن کو ڈسٹرکٹ ہیڈ کواٹرز ہسپتال منتقل کردیا گیا ہے اور حادثہ تیزرفتاری کے باعث پیش آیا ۔ڈاکٹرز کے مطابق ڈی ایچ کیو ہسپتال میں ایمرجنسی نافذ کردی گئی اور زخمیوں کا علاج معالجہ جاری ہے تاہم بیشتر زخمیوں کی حالت تشویشناک ہے جس سے ہلاکتوں میں اضافے کا خدشہ ظاہر کیا جارہا ہے ۔دوسری جانب نگران وزیراعلیٰ خیبرپختونخواہ جسٹس (ر)دوست محمد خان نے حادثے میں جانی نقصان پراظہار افسوس کرتے ہوئے سیکرٹری صحت کو ہدایت کی کہ زخمیوں کے علاج معالجے میں کوئی کسر نہ چھوڑی جائے اور ہسپتال میں ایمرجنسی نافذ کرکے طبی سہولیات کی فوری فراہمی یقینی بنائی جائے ۔ بونیر سے کراچی جانے والی مسافر بس اور ٹینکر میں خوفناک تصادم کے نتیجے میں 15افراد جاں بحق اور 45زخمی ہو گئے ،پولیس اور امدادی ٹیمیں جائے وقوعہ پر پہنچ گئیں ،زخمیوں کو ڈی ایچ کیو ہسپتال منتقل کردیا گیا ، ہلاکتوں میں اضافے کا خدشہ ظاہرکیا جارہا ہے۔