اسلام آباد (این این آئی)سابق چیئر مین سینٹ میاںرضا ربانی نے کہاہے کہ امریکی وزیر خارجہ کے آئی ایم ایف کے حوالے سے بیان سے واضح ہوچکا ہے کہ یہ مالیاتی ادارے سامراجی قوتوں کے آلہ کار بن چکے ہیں ۔سابق چیئرمین سینیٹ میاں رضا ربانی نے اپنے ایک بیان میں کہا کہ امریکہ کے سیکرٹری آف اسٹیٹ کا بیان کہ ’’پاکستان ملنے والے آئی ایم ایف بیل آؤٹ پیکیج کو چائنا کے قرض اتارنے میں استعمال نہ کرے ٗ‘اس بات کی غمازی کرتا ہے کہ بین الاقوامی مالیاتی ادارے ترقی پذیر ممالک کو مالی امداد دیتے ہوئے
ان کو امریکی خواہش کا پابند بناتے ہیں کہ خطے میں دوسرے ممالک کے ساتھ تعلقات کس طرح کے رکھنے چاہیے جبکہ ترقی پذیر ممالک بین الاقوامی مالیاتی اداروں سے معاشی بنیادوں پر قرضہ مانگتے ہیں جن کی شرائط بھی معاشی و اقتصادی ہی ہوتی ہیں۔اب تو بالکل واضح ہوچکا ہے کہ یہ مالیاتی ادارے سامراجی قووتوں کے آلہ کار بن چکے ہیں۔اگر منتظر حکومت آئی ایم ایف کے پاس جانے کا سوچ رہی ہے تو اسے فیصلہ کرنے سے پہلے پارلیمان کے دونوں ایوانوں میں اس مسئلے کو زیر بحث لانا چاہیے۔
