لاہور(سپورٹس ڈیسک)محمد عرفان کیریبیئن پریمیئرلیگ میں بارباڈوس ٹرائیڈنٹ کی نمائندگی کریں گے جب کہ 36سالہ پیسرعدم دستیابی ظاہر کرنے والے ہم وطن جنید خان کی جگہ لیں گے۔یواے ای میں شیڈول ایشیا کپ کے پیش نظر جنید خان نے کریبیئن پریمئر لیگ کیلیے عدم دستیابی ظاہر کردی ، پیسر 8اگست سے 16ستمبر تک شیڈول ٹی ٹوئنٹی ایونٹ میں بارباڈوس ٹرائیڈنٹ کی نمائندگی نہیں کرپائیں گے۔
جنید خان کا خلاپرکرنے کیلیے فرنچائز نے محمد عرفان کو شامل کرلیا ہے،طویل قامت پیسر 60ون ڈے میچز میں 83وکٹیں حاصل کرچکے، 20ٹی ٹوئنٹی انٹرنیشنل مقابلوں میں انھوں نے 15شکار کیے، مجموعی طور پر مختصر فارمیٹ کے 82میچ کھیل کر انھوں نے94مہرے کھسکائے ہیں۔فرنچائز کے ہیڈ کوچ روبن سنگھ نے کہا ہے کہ جنید خان کی خدمات سے محرومی مایوس کن ہے تاہم متبادل کے طور پر شامل کیے جانے والے محمد عرفان کی موجودگی میں ہماری ایونٹ میں مہم کمزور نہیں پڑے گی،لیفٹ آرم پیسر انٹرنیشنل کرکٹ کا اچھا تجربہ رکھتے ہیں،طویل قامت ہونے کی وجہ سے کسی بھی بیٹنگ لائن کو پریشان کرنے کی صلاحیت انھیں منفرد بناتی ہیں،ان کی موجودگی میں ہمارا اٹیک مزید مضبوط ہوگا۔ محمد عرفان کی صلاحیتوں سے بھرپور فائدہ اٹھائیں گے۔یاد رہے کہ بارباڈوس ٹرائیڈنٹ کی قیادت جیسن ہولڈر کرینگے،کیریبیئن پریمیئر لیگ میں ٹیم کی پہلی آزمائش 12اگست کو ایمزون واریئرز کیخلاف ہوگی، دوسرے میچ میں 17اگست کو سینٹ لوسیاکا سامنا کرنے کے بعد اسکواڈ جمیکا تلاواز کیخلاف میچ کیلیے امریکا روانہ بھی ہوگا۔
