راولپنڈی (مانیٹرنگ ڈیسک)سابق وزیر اعظم نواز شریف اور انکی صاحبزادی مریم نواز اڈیالہ جیل میں پہلی رات کاٹ چکے ہیں جہاں انہیں آج جیل میں انڈا ، پراٹھااور چائے کا ناشتہ پیش کیا گیا۔نجی ٹی وی نے دعویٰ کیا ہے کہ نواز شریف کو اڈیالہ جیل کے ہائی سکیورٹی زون میں رکھا گیا ہے جبکہ مریم نواز کو خواتین کی بیرکس میں قید کیا گیا ہے۔ جیل میں پہلی رات کاٹنے کے بعد باپ بیٹی فجر کی نماز کے وقت اٹھے اور نماز ادا کی۔
ذرائع نے بتایا کہ نواز شریف کوجیل میں ناشتے میں انڈا ، پراٹھا اور چائے پیش کی گئی۔ نواز شریف نے اڈیالہ جیل کی چائے سے ناشتہ کیا اور چائے کے ساتھ کچھ ادویات بھی لیں جبکہ مریم نواز نے جی بھر کر ناشتہ نہیں کیا۔واضح رہے سابق وزیراعظم میاں محمد نواز شریف اورمریم نواز کو گزشتہ رات اڈیالہ جیل منتقل کر دیا گیا تھا۔میڈیا رپورٹس کے مطابق نواز شریف کی لاہور میں گرفتاری کے بعد احتساب عدالت کے جج محمد بشیر کو نیب پراسیکیوٹر نے درخواست دی کہ انہیں عدالت میں پیش کرنا سکیورٹی رسک ہے مجرموں کی جیل منتقلی اور سزا پر عملدرآمد کے لئے وارنٹ جاری کیے جائیں جس پر عدالت نے ملزمان کی حاضری کے لئے ڈیوٹی مجسٹریٹ مقرر کیا اور سزا کے وارنٹ پر دستخط کر دیئے۔ ذرائع کا کہنا ہے کہ خصوصی میڈیکل بورڈ آج ممکنہ طور پر اڈیالہ جیل جائے گا جہاں وہ نواز شریف اور مریم نواز کا طبی معائنہ کرے گا۔میڈیکل بورڈ پولی کلینک ہسپتال کے سینئر ڈاکٹرز پر مشتمل ہو گا۔ کنسلٹنٹ، فزیشن ڈاکٹر آصف میڈیکل بورڈ کے چیئرمین ہونگے جبکہ شعبہ نیفرالوجی، میڈیسن اور امراض قلب کے ڈاکٹرز بھی میڈیکل بورڈ کا حصہ ہونگے۔
