کراچی (نیوزڈیسک) پاکستان پیپلز پارٹی پارلیمنٹرینز نے سابق اسپیکر قومی اسمبلی فہمیدہ مرزا اور سندھ اسمبلی کے رکن حسنین مرزا کو نوٹس ارسال کیا ہے، جس میں کہا گیا ہے کہ وہ اپنی پوزیشن واضح کریں۔ ذرائع کے مطابق پاکستان پیپلز پارٹی پارلیمنٹرینز کے جنرل سیکریٹری اور سابق وزیراعظم راجہ پرویز اشرف کی جانب سے سابق وزیر داخلہ سندھ ڈاکٹر ذوالفقار مرزا کی اہلیہ اور سابق اسپیکر قومی اسمبلی ڈاکٹر فہمیدہ مرزا اور ان کے بیٹے سندھ اسمبلی کے رکن بیرسٹر حسنین مرزا کو نوٹس بھیجا گیا ہے۔ نوٹس میں کہا گیا ہے کہ وہ اپنی پوزیشن واضح کریں کہ وہ پاکستان پیپلز پارٹی کے ساتھ ہیں یا کہ ڈاکٹر ذوالفقار مرزا کے ساتھ ہیں۔