لاہور(نیوزڈیسک)صوبائی دارالحکومت میں مختلف واقعات میں فائرنگ کر کے خاتون سمیت 3افراد کو قتل کر دیا گیا جبکہ ایک نوجوان کی تشدد زدہ لاش بھی برآمد ہوئی ہے ، پولیس نے تمام لاشیں پوسٹمارٹم کے لئے بھجوا کر تحقیقات شروع کر دی ۔ تفصیلات کے مطابق لاہور کے علاقہ جوہر ٹاﺅن میں پراپرٹی ڈیلر محمود خان گاڑی پر دفتر جانے کے لئے گھر سے نکلا کہ راستے میںدو نا معلوم موٹر سائیکل سواروںنے اندھا دھند فائرنگ کر دی اور فرار ہو گئے ۔ محمود خان کو شدید زخمی حالت میں جناح ہسپتال منتقل کیا گیا لیکن وہ زخموں کی تاب نہ لاتے ہوئے دم توڑ گیا۔ پولیس نے لاش پوسٹمارٹم کےلئے مردہ خانے منتقل کرکے ملزمان کی گرفتاری کے لئے کارروائی شروع کر دی ہے۔ پولیس کے مطابق واقعہ کاروباریا دیرینہ دشمنی کا شاخسانہ لگتا ہے اسی تناظر میں تمام پہلوﺅں پر تفتیش کی جائے گی۔ہنجر وال کے علاقہ میں دیور نے گھریلو جھگڑے پر اپنی بھابھی کو قتل کر دیا ۔ پولیس کا کہنا ہے کہ ملزم ساجد نے اپنی بھابھی کو فائرنگ کر کے قتل کیا ہے ۔