فیصل آباد(مانیٹرنگ ڈیسک)مسلم لیگ ن کے رہنماسابق صوبائی وزیر قانون رانا ثناء اللہ اوران کے مدمقابل پی ٹی آئی کے امیدوار ڈاکٹر نثار احمد جٹ نے اپنی اپنی کامیابی کیلئے گدی نشینوں کی خدمات حاصل کرلی ،پیروں کی دونوں کی کامیابی کیلئے دعا،خبر رساں ایجنسی کے مطابق قومی اسمبلی کے حلقہ این اے 106سے مسلم لیگ ن کے سابق صوبائی وزیر قانون رانا ثناء اللہ نے حضرت سلطان باہوکے دربار کے گدی نشین صاحبزادہ نجیب سلطان سے ملاقات کی اور اپنی کامیابی کیلئے دعا کرائی ۔

جبکہ پی ٹی آئی کے امیدوار ڈاکٹر نثار احمد جٹ نے سیال شریف کے سجادہ نشین پیر حمیدالدین سیالوی سے ملاقات کی اور اپنی کامیابی کیلئے دعاکرائی ۔یہ امر قابل ذکر ہے کہ پی ٹی آئی کے امیدوار ڈاکٹر نثار احمد جٹ2013ء میں اس حلقہ سے مسلم لیگ ن کے ٹکٹ پر کامیاب ہوئے تھے اب انہوں نے رانا ثناء اللہ خان سے اختلافات کی بناء پر مسلم لیگ ن سے الگ ہوکر پی ٹی آئی میں شمولیت اختیار کی ہے جبکہ وہ پیپلزپارٹی کے سابق ایم این اے مرحوم الیاس جٹ کے داماد ہیں اور مشرف دور میں مسلم لیگ ق سے کامیاب ہوتے تھے اور مسلم لیگ ق چھوڑ کر مسلم لیگ ن میں شامل ہوئے تھے تاہم ان کے ساتھ 2013ء میں کامیاب ہونے والے دونو ں صوبائی امیدوار ظفر اقبال ناگرہ اور میاں آصف اجمل اب رانا ثناء اللہ کے ساتھ مسلم لیگ ن کے ٹکٹ پر حصہ لے رہے ہیں ،اس طرح پی ٹی آئی کے امیدوار ڈاکٹر نثار احمد جٹ کے ساتھ صوبائی کے دو نوں امیدوار رانا آفتاب احمد خاں اور ندیم آفتاب سندھو کا تعلق پیپلزپارٹی سے تھا جو کہ اب پی ٹی آئی کے ٹکٹ پر انتخابات میں سے حصہ لے رہے ہیں اس حلقہ کو فیصل آباد کاسب سے بڑا مقابلہ تصور کیا جارہا ہے۔