سیالکوٹ(مانیٹرنگ ڈیسک) پاکستان مسلم لیگ( ن )کے رہنما سابق وزیر خارجہ خواجہ آصف نے چیئرمین پی ٹی آئی عمران خان کوکڑی تنقید کا نشانہ بنا تے ہوئے کہا ہے کہ اقتدار کیلئے لوگ سجدہ کرنے لگتے ہیں،خواہش اتنی شدید نہ ہوکہ انسان شرک کرنے لگے، نواز شریف اقتدار اور وزارت عظمی کا بھوکا نہیں، وہ 22کروڑ عوام کی عزت وحرمت کی بات کرتا ہے،دھرنوں یا غیر آئینی طور پرعوام کی آواز سبوتاژنہیں کیا جاسکتی۔

جتنی بجلی اب تک جمع ہوچکی 2030تک کافی ہے، آئندہ دوتین ماہ تک لوڈ شیڈنگ کا مکمل خاتمہ ہوجائے گا، دہشتگردی کے خلاف سب سے بڑی جنگ پاک فوج نے لڑی۔ فوج اور پولیس نے بہادری کے ساتھ دہشتگردی کا خاتمہ کیا۔انتخابی مہم کے دوران سیالکوٹ میں خطاب کرتے ہوئے خواجہ آصف نے کہا کہ یہاں اقتدار کے اتنے بھوکے لوگ ہیں جواقتدار کے حصول کے لیے اللہ کی بجائے مزارات کو سجدہ کرتے ہیں۔ خواہش اتنی شدید نہ ہوکہ انسان شرک کرنے لگے۔لیگی کارکنوں نے زن مرید کا نعرہ لگایا تو خواجہ آصف کہا کہ زن مرید تو ہمارے جیساہی ہے،وہ کچھ اور چیز ہے۔ عمران خان کی اپنی روحانی مرشد کے ساتھ شادی کا تذکرہ کرتے ہوئے کہا کہ لوگ پیروں کے پاس جاتے تھے عمران خان پیرگھرلے آیا۔انتخابی مہم کے حوالے سے خواجہ آصف نے کہا کہ جب نواز شریف کہتا ہے کہ ووٹ کو عزت دو تو وہ 22کروڑ عوام کی عزت وحرمت کی بات کرتا ہے۔ وہ اقتدار اور وزارت عظمی کا بھوکا نہیں۔نواز شریف جب جلا وطن ہوا تو لوگ کہتے تھے واپس نہیں آئے گا لیکن وہ واپس آئے اور تیسری بار وزیراعظم بنے۔ خلق خدا کے فیصلے بدلنے کا حق کسی کو حاصل نہیں۔ دھرنوں یا غیر آئینی طور پرعوام کی آواز سبوتاژنہیں کیا جاسکتی، عوام ہمیں اقتداردیتی ہے تو ہمارا حق ہے کہ وہ ہمیں پانچ سال پرکھے،ہم خدمت نہ کریں تو عوام نئے لوگوں کو منتحب کرے۔خواجہ آصف نے لیگی حکومت کے ترقیاتی کام گنواتے ہوئے خوب تعریفوں کے پل باندھے۔

کہا نواز شریف جب بھی وزیراعظم بنے ترقی کا سفر جاری رکھا اور جب گئے تویہ سفر رک گیا۔پہلی بار 1991 میں وزیراعظم بننے پر ملکی معیشت کو آزاد اوردوسرے دورمیں اسلام آباد لاہورموٹروے بنائی، پاکستان کواسلامی دنیا کی واحد ایٹمی طاقت بنایا جس کی وجہ سے بھارت ہم پرآج تک حملہ نہیں کرسکا۔ تیرہ سال بعد تیسری باروزیراعظم بننے پراجالے لوٹا دیے۔سابق وزیرخارجہ نے کہا جتنی بجلی اب تک جمع ہوچکی 2030تک کافی ہے۔

آئندہ دوتین ماہ تک لوڈ شیڈنگ کا مکمل خاتمہ ہوجائے گا۔ نواز شریف نے پورے ملک میں 1800 کلو میٹر کی موٹر ویز بنائیں،نسٹ یونیورسٹی کے لیے سمبڑیال میں 50ایکڑزمین مختص کی گئی۔ شہراقبال میں ویمن یونیورسٹی اور میڈیکل کالج کا قیام بھی نوازشریف کے دورمیں ہوا۔خواجہ آصف نے پاک فوج کی تعریف کرتے ہوئے کہا کہ دہشتگردی کے خلاف سب سے بڑی جنگ پاک فوج نے لڑی۔ فوج اور پولیس نے بہادری کے ساتھ دہشتگردی کا خاتمہ کیا۔

موضوعات:خواجہ آصف