کراچی(نیوزڈیسک) پاکستان پیپلز پارٹی کے شریک چیئرمین اور سابق صدر پاکستان آصف علی زرداری نے پی پی پی کے سینیٹر جہانگیر بدر کی سربراہی میں ایک کمیٹی قائم کی تھی تاکہ شہید ذوالفقار علی بھٹو کے جوڈیشل مرڈر کے حوالے سے کیس کو ری اوپن کیا جائے۔ اس حوالے سے سی ای سی کی میٹنگ میں فیصلہ کیا گیا کہ چاروں صوبوںآزاد کشمیر اور گلگت بلتستان کی بار ایسوسی ایشنز سے قرار دادیں پاس کروائی جائیں اور تمام قرار دادوں کو یکجا کر کے سینیٹر جہانگیر بدر کی قیادت میں ایک اعلیٰ سطح وفد چیف جسٹس آف پاکستان سے ملاقات کرے اور انہیں تمام قرار دادیں پیش کر کے ان سے شہید ذوالفقار علی بھٹو کے کیس کو ری اوپن کروانے کی درخواست کی جائے گی کہ کیس کو ری اوپن کر کے انصاف کے تقاضوں کے عین مطابق فیصلہ سنایا جائے۔واضح رہے کہ مرحوم سابق چیف جسٹس نسیم حسن شاہ نے شہید ذوالفقار علی بھٹو کے جوڈیشل مرڈر کے حوالے سے عوام کے سامنے کیا تھا کہ اس وقت عدلیہ مارچل لا کے زیر اثر مجبور تھی اور اس فیصلے میں وہ خود بھی شریک تھے۔ اس ضمن میں پیپلز لائرز فورم کے ایڈوکیٹ صدر قاضی بشیر نے کہا کہ شہید ذوالفقار علی بھٹو کے کیس کو ری اوپن کروانے کے سلسلے میں 806 وکلا کے دستخطوں سے سندھ ہائی کورٹ بار، کراچی بار اور ملیر بار سے قرار دادیں منظور کروائیں۔ ان قرار دادوں کو ملک کے تمام مقتدر اداروں کے سربراہان کو ارسال کر دیا گیا ہے۔ ایڈوکیٹ قاضی محمد بشیر نے پاکستان میں سب سے پہلے قراردادیں منظور کرنے پر سندھ ہائی کورٹ بار، کراچی بار اور ملیر بار کا شکریہ ادا کیا