کراچی (نیوزڈیسک) سابق اسپیکر قومی اسمبلی ڈاکٹر فہمیدہ مرزا نے کہاہے کہ سابق وزیر داخلہ سندھ کے ساتھ ایسا رویہ موجودہ حکومت کو زیب نہیں دیتا ہے ، انہوں نے کہا کہ میں کافی دنوں تک خاموش رہی لیکن اب مجبورا حالات کی سنگینی کو دیکھتے ہوئے پریس کانفرنس کرنے پر مجبور ہوئی ہوں۔منگل کو کراچی میں اپنی رہائش گاہ پر ہنگامی پریس کانفرنس کرتے ہوئے ڈاکٹر فہمیدہ مرزا نے کہاکہ صوبے کی پولیس سیاسی ہوگئی ہے۔انہوں نے کہا کہ اگر بدین کے جیالوں کے گھروں پر چھاپے مارنے کا سلسلہ بند نہیں کیا گیا تو پورا بدین گرفتاری دے گا، فہمیدہ مرزا نے کہا کہ بدین میں ایسا ماحول بنایا جا رہا ہے جس سے کسی بڑے نقصان کا اندیشہ ہے ، میں نے آئی جی سمیت سب کو خطوط لکھے کہ سیکورٹی فراہم کی جائے لیکن سیکورٹی نہیں دی گئی مجھے آج بے نظیر بھٹو شہید بہت شدت سے یاد آرہی ہیں، ہم نے جمہوریت کے لئے آگے بڑھ کر کام کیا لیکن اس کا صلہ اس طرح دیا جا رہا ہے ۔