کراچی (نیوزڈیسک)سندھ اسمبلی میں الطاف حسین کے خلاف مذمتی قراردادمنگل کو بھی پیش نہ ہو سکی، اجلاس میں خوب ہنگامہ آرائی کی گئی اور ایوان مچھلی منڈی کا منظر پیش کرتا رہا۔ سندھ اسمبلی کا اجلاس ا سپیکرآغا سراج درانی کی زیرصدارت سوا گھنٹے کی تاخیر سے شروع ہوا۔اجلاس میں اپوزیشن کی تین جماعتوں پی ٹی آئی، ن لیگ اور فنکشنل لیگ نے فوج کی حمایت اور ایم کیوایم کے خلاف قرارداد پیش کرنا چاہی توا سپیکر نے آوٹ آف ٹرن قرارداد پیش کرنے کی اجازت نہیں دی جس پر تینوں جماعتوں کے ارکین نے سخت احتجاج کیا۔بعد میں جب صوبائی وزیرتعلیم نثارکھوڑو نے بولنا شروع کیا تو فنکشنل لیگ نے احتجاج شروع کردیا جس پر نثار کھوڑو جذباتی ہوگئے اور فنکشنل لیگ کے ارکان پر خوب برسے۔ صوبائی وزیرتعلیم کا کہنا تھا کہ پیپلز پارٹی پر حملہ کیا جار ہا ہے لیکن سندھ کی تقسیم نہیں ہونے دی جائیگی۔اس موقع پر مسلم لیگ فنکشنل کے ارکان نے شیم شیم کے نعرے لگائے۔ اسپیکر سندھ اسمبلی آغاسراج درانی کا کہناتھا کہ کوئی بھی قرار داد ٹیک اپ کرنے کی مدت سات روز ہوتی ہے، انہیں اس معاملے پر ڈکٹیٹ نہ کیا جائے۔