لاڑکانہ (مانیٹرنگ ڈیسک) چیف جسٹس ثاقب نثار اس وقت سندھ کے شہر لاڑکانہ میں موجود ہیں جہاں ان کے ساتھ چیف جسٹس سندھ ہائیکورٹ بھی ہمراہ ہیں۔ چیف جسٹس کے چانڈکا میڈیکل کالج کے دورے کے دوران ایک خاتون بھی بیٹے کی رہائی کی دہائی دینے پہنچ گئی۔ بیٹے کے جیل میں ہونے پر خاتون نے چیف جسٹس کے سامنے احتجاج کیا ، خاتون نے دہائی دی کہ اس کا بیٹا بےگناہ ہے۔
خاتون جب اپنی بات سنانا چاہ رہی تھی تو پولیس اہلکاروں نے اسے دھکے دینے شروع کردیے ۔ خاتون کو دھکے دینے پر چیف جسٹس نے پولیس اہلکاروں کی سرزنش کردی۔ انہوں نے پولیس اہلکاروں کو مخاطب کرکے کہا ’کیوں دھکے دیتے ہو، اب دھکے دے کر دکھائیں‘۔ جسٹس ثاقب نثار نے چیف جسٹس سندھ ہائیکورٹ احمد علی شیخ کومعاملہ حل کرنے کا حکم دے دیا۔
