بہاولپور (نیوزڈیسک) وزیراعظم نواز شریف نے کہا ہے کہ کراچی میں بھتہ خوری کا تقریباً خاتمہ ہوچکا اور اب وہاں سیاسی حالات بہتر بنانے کی ضرورت ہے۔بہاولپور میں ملک کے پہلے شمسی توانائی کے منصوبے کی افتتاحی تقریب سے خطاب کے دوران وزیر اعظم نے کہا کہ دہشت گردی کا خاتمہ اور کراچی میں امن قائم کرنا ترجیح ہے، آج پاکستان میں امن قائم ہورہا ہے، جہاں دہشت گردی ہورہی تھی اس علاقے کو پاک صاف کردیا۔ دہشت گردی کے خاتمے کے لئے پاک فوج نے بہت اچھا کام کیاہے،جس پر وہ شاباش کی مستحق ہے، کراچی کے حالات بھی پہلے سے کہیں بہتر ہوچکے ہیں، وہاں بھتہ خوری کا تقریباً خاتمہ ہوچکا اور اب وہاں سیاسی حالات بہتر بنانے کی ضرورت ہے۔وزیر اعظم نواز شریف کا کہنا تھا کہ ملک میں یہ پہلا موقع ہے جب جمہوری حکومت عملی طور پر کام کرکے دکھا رہی ہے، گلی محلوں کے منصوبے پڑے رہتے ہیں کام ہی نہیں کیا جاتا،یہ روایت اب ختم ہوتی جارہی ہے،منصوبے وقت پر مکمل ہوں گے، ہمیں ملک سے غربت کا خاتمہ کرنا ہے، ملک میں ایک بار پھر ترقی اور صنعتوں کا کا پہیا چلتا نظر آئے گا، دنیا پاکستان کی معاشی ترقی کا اعتراف کررہی ہے،پاکستان کی تاریخ میں پہلی بار46 ارب ڈالر کی سرمایہ کاری ہورہی ہے۔ انہوں نے کہا کہ حکومت نے پاکستان سے اندھیروں کو دور کرنے کا عزم کر رکھا ہے، پاکستان میں بجلی واپس لائیں گے، ملک میں دوبارہ روشنیاں ہوں گی اور 2018 تک لوڈشیڈنگ کا مکمل خاتمہ ہوجائے گا۔