اسلام آباد(نیوز ڈیسک) ایران کے صدر حسن روحانی نے کہا ہے کہ پولیس کا کام اسلام سے متعلق رہنمائی کرنا نہیں ہے۔ انہوں نے کہا کہ قانون نافذ کرنے والے ادارے مذہبی شعائر کے نفاذ کے معاملے سے خود کو دور رکھیں۔نسبتاً معتدل مزاج کے حامل حسن روحانی نے گزشتہ ہفتے زور دیا تھا کہ کہ مذہبی معاملات میں پولیس کا کوئی کردار نہیں ہے، جس کی وجہ سے انہیں اسلامی جمہوریہ ایران کی مذہبی اسٹیبلشمنٹ اور قدامت پسند اراکین اسمبلی کی جانب سے تنقید کا نشانہ بنایا گیا تھا۔تاہم انہوں نے گزشتہ روز اساتذہ سے خطاب کرنے کے دوران اس مسئلے پر اپنے مو¿قف کا ایک مرتبہ پھر اعادہ کرتے ہوئے کہا کہ پولیس کا جوکام ہے وہ کرے اور مذہبی پیشوا کا کردار ادا نہ کرے۔انہوں نے کہا کہ اگر ہم آپ سے کہیں کہ آپ مذہبی عالم ہیں اور آپ اسلام کی تشریح کرسکتے ہیں تو پھر انتشار پھیل جائے گا۔حسن روحانی نے کہا کہ اسکول، یونیورسٹی اور مدرسوں کے تمام اساتذہ جن کا مشن ہے کہ وہ مذہب کا بہتر فہم حاصل کریں اور اس کا اظہار کریں، ان کی یہ ذمہ داری ہے کہ وہ اسلام کی تدریس اور اس کی وضاحت کرےں۔