کراچی (نیوز ڈیسک)سائٹ ایریا میں ٹیکسٹائل فیکٹری میں لگنے والی آگ شدت اختیار کر گئی ہے جسے بجھانے کے لئے شہر بھر سے فائر ٹینڈرز طلب کر لئے گئے ہیں۔ کراچی کے علاقے سائٹ میں واقع ایک ٹیکسٹائل فیکٹری میں اچانک آگ لگ گئی جسے بجھانے کے لئے ابتدائی طور پر 10 فائر ٹینڈرز بھیجے گئے تاہم آگ کی شدت زیادہ ہونے کے باعث فائر بریگیڈ حکام نے اسے تیسرے درجے کی قرار دے کر شہر بھر سے فائر ٹینڈرز طلب کر لئے ہیں۔ ٹیکسٹائل میں لگنے والی آگ کے نتیجے میں 5 خواتین سمیت 8 افراد جھلس کر زخمی بھی ہوئے جنہیں فوری طور سول اسپتال کے برنس وارڈ منتقل کیا گیا جہاں انہیں طبی امداد دی جا رہی ہے۔ آگ لگنے کی وجوہات معلوم نہیں ہو سکی ہیں۔فائر بریگیڈ حکام کا کہنا ہے کہ آگ پر قابو پانے کے لئے کے پی ٹی، سول ایوی ایشن اور نیوی سے بھی مدد طلب کر لی گئی ہے جب کہ آگ پر قابو پانے میں 2 سے 3 گھنٹے لگ سکتے ہیں۔