ممبئی(نیوز ڈیسک) اداکارہ شردھا کپور کو بالی ووڈ کی چمکدار دنیا میں قدم رکھے زیادہ عرصہ نہیں گزرا ہے مگر وہ اے کلاس اداکاراو¿ں میں اپنی جگہ بنانے میں کامیاب ہوگئی ہے جس میں اس کی کام سے لگن اور محنت کا بہت بڑا ہاتھ ہے حال ہی میں شردھا کپور کام کو دوسرے امور پر فوقیت دیتے ہوئے اپنی دوستوں کے ساتھ پہلے سے طے شدہ سیروتفریح کا پروگرام کینسل کرکے اپنی کام سے لگن کا نیا ثبوت دے دیا ہے۔
اطلاعات کے مطابق شردھا نے دوماہ قبل اپنی دوستوں کے ساتھ جزیرہ میکرونیزیا (Micronesia) کی سیر پر جانے کے لیے منصوبہ بندی کرنا شروع کردی تھی اور اس سلسلہ میں ان کا وہاں سات روز تفریح کا پروگرام تھا۔ اور وہ ایک لائسنس یافتہ سکوبا ڈائیور ہونے کی وجہ سے وہاں جاکر سمندر کی لہروں سے کھیلنا چاہتی تھی تاہم اداکارہ کی آنے والی فلم ”اے بی سی ڈی 2“ اور دیگر تشہیری فلموں کی عکسبندی آڑے آگئی جس کی بنا پر اس نے سیر تفریح کو پس پشت ڈالتے ہوئے کام کو ترجیح دی اور اپنی فلم کی شوٹنگ میں مصروف ہوگئی جب کہ اس کی دوستیں پروگرام کے مطابق روانہ ہوگئیں۔
اس سلسلہ میں شردھا کا کہنا ہے کہ میں اس تفریحی پروگرام کا شدت سے انتظار کررہی تھی اور اس کے لیے مکمل تیاری بھی کرلی تھی مگر میری فلمی مصروفیات آڑے آگئیں جنھیں چھوڑ کر سیرو تفریح کے لیے نکل جاتی تو خود کو مجرم تصور کرتی اس لیے میں نے کام کو دوسرے امور پر ترجیح دی ہے تا کہ میرا ضمیر مطمئین رہے اور اب جونہی کوئی فارغ وقت ملے گا دوبارہ اس طرح کی تفریح کا پروگرام ترتیب دوں گی۔