اسلام آباد (نیوزڈیسک)سندھ اور بلوچستان سمیت ملک کے بیشتر حصوں میں شدید گرمی کی لپیٹ میں ہیں جومزید چند روز تک جاری رہے گی۔ محکمہ موسمیات کے مطابق ملک کے بیشتر علاقوں میں موسم گرم اور مطلع صاف ہے تاہم مالاکنڈ ڈویڑن اورگلگت بلتستان میں مطلع جزوی طورپرابرآلود ہے۔ آج ملک بھرمیں سب سے زیادہ گرمی تربت اوررحیم یارخان میں رہی جہاں زیادہ سے زیادہ درجہ حرارت 43 ڈگری سینٹی گریڈ ریکارڈ کیا گیا۔ اس کے علاوہ چھور، بینظیر آباد اور سکھر میں 42، خضدار اور حیدرآباد میں درجہ حرارت41، بہاولپور میں 40، ڈیرہ غازی خان، اوکاڑہ اور ساہیوال میں 39، لاہور میں 37 جب کہ کراچی میں زیادہ سے زیادہ درجہ حرارت 35 ڈگری سینٹی گریڈ ریکارڈ کیا گیا۔محکمہ موسمیات کا کہنا ہے کہ آئندہ چند روز کے دوران ملک کے بیشترعلاقوں میں موسم گرم اور خشک رہے گا جب کہ سندھ ، بلوچستان اور جنوبی پنجاب میں شدید گرمی کی لہر برقرار رہے گی۔