لاہور(مانیٹرنگ ڈیسک) کیمسٹ اینڈ ڈرگسٹ ایسوسی ایشن کی جانب سے ہڑتال کے باعث لاہور صوبے کے بیشتر شہروں میں مسلسل چوتھے روز بھی میڈیکل اسٹورز بند رہے جس کی وجہ سے مریضوں اور انکے لواحقین کو شدید مشکلات کا سامنا رہا ،ہول سیلرز اور ریٹیلرز نے ہڑتال جاری رکھتے ہوئے پیر کے روز ناصر باغ میں جمع ہو کر احتجاج کا بھی اعلان کر دیا ۔ تفصیلات کے مطابق پنجاب ڈرگ ایکٹ 2017ء میں ترمیم کے خلاف لاہور ،ملتان، گوجرانوالہ، کبیروالا،
راجن پور، وہاڑی، منڈی بہاؤاالدین، جھنگ، بہاولپور سمیت بیشتر شہروں کی تمام میڈیسن مارکیٹیں مسلسل چوتھے روز بھی بند رہیں جس کے باعث بیمار خصوصاً آپریشن کے مراحل سے گزرنے والے مریض اور ان کے لواحقین شدید پریشان ہیں ۔میڈیکل اسٹورز مالکان کا کہنا ہے کہ پنجاب حکومت کی جانب سے فیصلہ واپس نہ لئے جانے تک ہڑتال جاری رکھی جائے گی۔گزشتہ روز مزید فیصلہ کیا گیا ہے کہ ہڑتال جاری رکھنے کے ساتھ آج ناصر باغ میں جمع ہو کر احتجاج کیا جائے گا ۔
