لاہور ( مانیٹرنگ ڈیسک) احتساب عدالت نے آشیانہ سکیم ہاؤسنگ سکینڈل میں سابق ڈائریکٹر جنرل لاہور ڈویلپمنٹ اتھارٹی احد چیمہ سمیت دیگر ملزمان کے جسمانی ریمانڈ میں 15 روز کی مزید توسیع کرتے ہوئے قومی احتساب بیورو ( نیب ) لاہور کے حوالے کر دیا ۔ گزشتہ روز لاہور کی احتساب عدالت کے جج سید نجم الحسن کے روبو احد چیمہ سمیت دیگر ملزمان کو جسمانی ریمانڈ ختم ہونے پر سخت سکیورٹی حصار میں پیش کیا گیا۔

نیب پراسیکیوٹر کی جانب سے عدالت کو بتایا گیا کہ احد چیمہ نے اسلام آباد میں ایک پلاٹ ظاہر کیا تھا لیکن ایک اور پلاٹ بھی ہے، احد چیمہ کے علاوہ ان کے گھرانے کے دوسرے افراد کے نام پر بھی پلاٹ ہیں،احد چیمہ اور ان کی اہلیہ کے نام فارن کرنسی اکاؤنٹ بھی ہیں،احد چیمہ کے لیپ ٹاپ سے بھی اہم ریکارڈ ملا ہے،احد چیمہ کی بے نامی جائیدادیں بھی بنائی ہیں جس کی تحقیقات جاری ہیں لہٰذا جسمانی ریمانڈ کی استدعا منظور کی جائے۔عدالت نے نیب کے وکیل سے استفسار کیا کہ اتنی دیر میں آپ کچھ نہیں کر پائے، پیراگون کے متعلق کوئی فائل ہے تو بتائیں،آپ کہتے ہیں کہ 2 ہزار کنال اراضی آشیانہ کی پیراگون کو دی اس کی تفصیل بتائیں نقشہ بنا کر واضح کریں کہ کتنی جگہ تھی اور کہاں تھی ۔ملزمان کے وکیل نے نیب کی جانب سے مزیدریمانڈ کی مخالفت کرتے ہوئے کہا کہ جسمانی ریمانڈ میں نیب کو ملزمان کے خلاف کچھ نہیں ملا اور نہ کوئی الزام ثابت ہوا ہے۔احتساب عدالت نے جسمانی ریمانڈ کی استدعا پر فیصلہ محفوظ کر لیا اور بعدازاں فیصلہ سناتے ہوئے ملزمان کے جسمانی ریمانڈ میں 15 دن کی توسیع کردی۔، عدالت نے تمام ملزمان کو 11 مئی کو دوبارہ پیش کرنے کا حکم دے دیا ہے۔