لاہور ( نیوزڈیسک)وزیراعلی پنجاب محمد شہباز شریف نے کہا ہے کہ دہشت گردی کے خلاف نیشنل ایکشن پلان پر موثر عملدرآمد کے مثبت نتائج برآمد ہو رہے ہیں، دہشت گردی کے ناسور کے خاتمے کیلئے پوری قوم نے بے مثال اتحاد و اتفاق کا مظاہرہ کیا ہے، دہشت گردوں کے ساتھ ان کے سہولت کاروں کے خلاف بھی فیصلہ کن کارروائی جاری ہے، پاکستان میں انتہاپسندی، دہشت گردی اور فرقہ واریت کی کوئی گنجائش نہیں، 18 کروڑ پاکستانیوں کے اتحاد کی قوت سے دہشت گردی کے ناسور کا ہمیشہ ہمیشہ کیلئے خاتمہ کریں گے اور پاکستان امن و سلامتی کا گہوارہ بنے گا۔وزیراعلیٰ محمد شہباز شریف نے ان خیالات کا اظہار مختلف اضلاع سے تعلق رکھنے والے اراکین اسمبلی سے گفتگو کرتے ہوئے کیا جنہوں نے یہاں ان سے ملاقات کی۔ وزیراعلی نے اس موقع پر گفتگو کرتے ہوئے کہا کہ پاکستان مسلم لیگ (ن) کی حکومت ملک کو مسائل کے چنگل سے نکالنے کیلئے کوشاں ہے اور عوام کو حقیقی معنوں میں ریلیف فراہم کر رہی ہے۔محروم معیشت طبقات کے معیار زندگی میں بہتری لانے کے مشن پر عمل پیرا ہیں۔ معاشرے کے غریب اور پسے ہوئے طبقات کی فلاح کیلئے متعدد پروگرام کامیابی سے جاری ہیں۔ آشیانہ، میٹرو بس سروس، تعلیمی فنڈ، خود روزگار سکیم، اپنا روزگار پروگرام جیسے فلاحی منصوبوں سے عوام بڑی تعداد میں مستفید ہو رہے ہیں۔ وزیراعلی نے کہا کہ گزشتہ 7 سالوں سے صوبے کے عوام کی بے لوث خدمت کر رہے ہیں اور خدمت خلق کا یہ سفر آئندہ بھی جاری رہے گا- تعلیم، صحت، پینے کے صاف پانی اور ٹرانسپورٹ کی بہترین سہولتوں کی فراہمی پر اربوں روپے صرف کئے جا رہے ہیں، صوبے میں انفراسٹرکچر کو بہتر بنانے پر خصوصی توجہ مرکوز کی گئی ہے۔ ”خادم پنجاب دیہی روڈز پروگرام“ کے تحت صوبے بھر کی دیہی سڑکوں کی تعمیر و بحالی کا شاندار پروگرام شروع کیا گیا ہے، وسائل قوم کی امانت ہیں اور ہم یہ امانت انہیں لوٹا رہے ہیں۔ شفافیت، برق رفتاری اور معیار پنجاب حکومت کی پالیسی ہے اور اسی پالیسی کے تحت تمام ترقیاتی منصوبے مکمل کئے جا رہے ہیں۔ انہوں نے کہا کہ صوبے میں کرپشن فری کلچر کو فروغ دیا گیا ہے- مخالف بھی ہم پر ایک دھیلے کی کرپشن کا الزام نہیں لگا سکتے۔مسلم لیگ (ن) کی حکومت نے دور آمریت کے سابق حکمرانوں کی کرپشن کے قبرستانوں کو ترقی کے میناروں میں بدل دیا ہے۔ انہوں نے کہا کہ چین کے صدر کا دورہ پاکستان ایک گیم چینجر کی حیثیت رکھتاہے۔ چین کا 46 ارب ڈالر کا تاریخ ساز اقتصادی پیکیج ملک میں ترقی و خوشحالی کے نئے دور کا آغاز ہے۔ توانائی منصوبوں کو تیز رفتاری سے مکمل کرنے کیلئے دن رات ایک کر دیں گے اور وزیراعظم نواز شریف کی قیادت میں ملک سے اندھیرے دور کرنے کا وعدہ پورا کریں گے۔ انہوں نے کہا کہ کنٹونمنٹ بورڈز کے بلدیاتی انتخابات کے نتائج نے الےکشن 2013 میںدھاندلی کا الزام لگانے والوںکو آئینہ دکھا دیاہے۔ عوام نے بے لوث خدمت کرنے والوں کو منتخب کیا ہے جبکہ احتجاجی سیاست کرنے والوں کو مسترد کیا ہے۔ اراکین اسمبلی نے وزیراعلی کو چین کے 46 ارب ڈالر کے اقتصادی پیکیج اور کنٹونمنٹ بورڈز کے بلدیاتی انتخابات میں مسلم لیگ (ن) کی شاندار کامیابی پر مبارکباد دی اور کہا کہ مسلم لیگ (ن) کی قیادت کی توانائی بحران کے خاتمے کیلئے سنجیدہ کاوشیں ضرور رنگ لائیں گی