سری نگر (نیوز ڈیسک) بالی ووڈ سپر سٹار سلمان خان کو ایک بڑے آرٹسٹ کے طور پر تو دنیا جانتی ہے لیکن کم لوگ جانتے ہیں کہ وہ ایک انتہائی شفیق اور ہمدرد انسان بھی ہیں۔اخبار ”ممبئی مرر“ کے مطابق سلمان خان مقبوضہ کشمیر میں شوٹنگ کے لئے گئے تو اننت ناگ شہر کے ایک مفلوک الحال مسلمان خاندان کی زندگی بدل دی۔ دور دراز پسماندہ گاﺅں دیارو سے تعلق رکھنے والی 75 سالہ خاتون زینا بیگم نے سلمان خان سے درخواست کی تھی کہ ان کی بیوہ بیٹی اپنے چار بچوں کے ساتھ ان کے ہاں مقیم ہے اور ان کی دیکھ بھال کرنے والا اور کوئی نہیں ہے۔ سلمان خان نے معمر خاتون کی داستان غم سن کر فوری طور پر ان کے اٹھارہ سالہ نواسے گوہر احمد بھٹ کو اپنی فلم کے سیٹ پر ملازمت دے دی اور اس بات کو یقینی بنایا کہ انہیں اپنے خاندان کی مناسب گزر اوقات کے لئے خاطر خواہ رقم ملے۔ انہوں نے گوہر سے یہ بھی کہا کہ کشمیر میں شوٹنگ کے خاتمے پر وہ ان کے ساتھ ممبئی آجائے اور وہاں کام کرے۔ انہوں نے نوجوان کو یقین دلایا کہ اب ان کے خاندان کو کبھی بھی کسی اور سے مدد طلب کرنے کی ضرورت پیش نہیں آئے گی۔ بزرگ خاتون زینا بیگم کا کہنا تھا کہ سلمان خان ان کے لئے مسیحا بن کر آئے اور جب دنیا میں کوئی ان کا ہاتھ تھامنے والا نہ تھا تو سلمان ان کے لئے فرشتہ ثابت ہوئے جنہوں نے اپنوں سے بھی بڑھ کر ان کی مدد کی۔