اسلام آباد(نیوز ڈیسک) بھارت میں خواتین کے لیے بس میں سفر کرنا ممکن نہیں رہا۔ پنجاب میں ماں بیٹی کو جنسی طور پر ہراساں کرنے کے بعد چلتی بس سے نیچے پھینک دیا۔ چودہ سالہ لڑکی ہلاک جبکہ ماں اسپتال میں داخل ہے۔تفصیلات کے مطابق موگا کے علاقے میں خاتون اپنی چودہ سالہ بیٹی کے ساتھ سفر کر رہی تھی کہ کنڈکٹر سمیت چھ افراد نے ماں بیٹی کو جنسی طور پر ہراساں کرنا شروع کر دیا۔ خاتون نے ڈرائیور کو بس روکنے کے لیے کہا لیکن اس نے رفتارمزید بڑھا دی۔ ملزمان نے دونوں ماں بیٹی کو چلتی بس سے دھکا دے دیا۔ چودہ سالہ لڑکی جانبر نہ ہو سکی جبکہ والدہ کو اسپتال میں طبی امداد دی جا رہی ہے۔ پولیس نے بس کنڈیکٹر کو گرفتار کرنے کا دعوی کیا ہے۔ عوامی اور سیاسی حلقوں میں واقعے پر شدید تنقید کی جا رہی ہے۔