اسلام آباد(مانیٹرنگ ڈیسک)عمران خان کا تحریک انصاف کو کراچی میں منظم کرنے کا فیصلہ، اہم سیاسی شخصیات کی تحریک انصاف میں شمولیت کیلئے فیصل واڈا کو گرین سگنل دیدیا گیا۔ تفصیلات کے مطابق تحریک انصاف کے چیئرمین عمران خان نے شہر قائد میں پارٹی کو منظم کرنے کا فیصلہ کیا ہے اور اس سلسلے میں تحریک انصاف کراچی کے رہنما فیصل واڈا کو اہم ٹاسک سونپ دیا گیا ہے۔
فیصل واڈا ان دنوں اسلام آباد میں موجود ہیں جہاں بنی گالہ میں انہوں نے عمران خان سے ملاقات کی اور عام انتخابات سے قبل کراچی کی سیاسی صورتحال سمیت پارٹی امور پر تبادلہ خیال کیا۔ فیصل واڈا کے ساتھ ملاقات میں عمران خان نے انہیں کراچی میں اہم سیاسی شخصیات کی تحریک انصاف میں شمولیت کے حوالے سے گرین سگنل دیدیا ہےجس کے بعد امکان ظاہر کیا جا رہا ہے کہ آنے والے دنوںمیں کراچی کی سیاسی جماعتوں کی وکٹیں گر سکتی ہیں اور کئی اہم سیاسی شخصیات پی ٹی آئی میں شمولیت اختیار کرسکتی ہیں ۔ذرائع کے مطابق عمران خان نے کراچی کی اہم سیاسی شخصیات کی تحریک انصاف میں شمولیت کے حوالے سے دیگر رہنمائوں سے بھی رابطہ کیا ہے جبکہ آنے والے دنوں میں کراچی میں انتخابی مہم، پارٹی تنظیم سازی سے متعلق اہم فیصلے متوقع ہیں۔یاد رہے کہ 2013 انتخابات میں کراچی میںپی ٹی آئی کوغیرمتوقع ردعمل ملا تھا، ایک اندازے کے مطابق عمران خان کی جماعت کراچی سے ساڑھے آٹھ لاکھ ووٹ لینے میں کامیاب رہی تھی. البتہ وہ نشستیں اپنے نام نہیں کرسکی. پی ٹی آئی چیئرمین نے اس ناکامی کو دھاندلی کا نتیجہ قرار دیا تھا.واضح رہے کہ 2013 کے بعد کراچی میں ہونے والے ضمنی اور بلدیاتی انتخابات میں پی ٹی آئی خاطر خواہ کامیابی حاصل نہیں کرسکی۔
