روم (مانیٹرنگ ڈیسک) پاکستان میں معمولی نوعیت کے مقدمے عموماً ایک طویل عرصے تک چلتے ہیں اور التوا کا شکار رہتے ہیں لیکن ایسا صرف پاکستان میں نہیں ہوتا، ترقی یافتہ ممالک میں بھی ایسا ہو جاتا ہے، ایک نجی ٹی وی چینل کی رپورٹ کے مطابق اٹلی میں ایک معمولی واقعہ پر قید شخص کو نو سال بعد رہا کر دیا گیا، رپورٹ کے مطابق اٹلی میں ایک بے روزگار شخص کو صرف ایک بینگن چرانے پر گرفتار کر لیا گیا تھا۔ 2009ء میں 49 سالہ شخص نے 20 سینٹ مالیت کا بینگن چوری

کیا جس پر قانونی چارہ جوئی کے دوران 8000 یورو خرچ ہوئے یعنی ساڑھے گیارہ لاکھ روپے پاکستانی خرچ ہوئے۔ مقامی عدالت نے ابتدائی طور پر ملزم کو چوری کے مقدمے میں 5 ماہ قید اور 300 یورو جرمانے کی سزا سنائی، بعد ازاں اس سزا میں کمی کردی گئی جب کہ سزا میں کمی پر وکلاء نے فیصلے کو ملک کی سب سے بڑی عدالت میں چیلنج کردیا، بڑی عدالت سے فیصلہ آنے میں نو سال لگ گئے، حال ہی میں وہاں کی اعلیٰ عدالت نے اپنا فیصلہ سنایا اور ملزم کو نو سال بعد بری کردیا گیا۔