لندن(این این آئی)ایک نئی تحقیق میں کہاگیا ہے کہ انسانی سرگرمیوں کے باعث سنہ 2100 کے اواخر تک افریقی ممالیہ جانوروں اور پرندوں کی نصف نسلیں معدوم ہوسکتی ہیں۔غیرملکی خبررساں ادارے کے مطابق دنیا بھر سے 550 ماہرین کی تیار کردہ اس رپورٹ میں کہا گیا ہے کہ حیاتی نظام کے تنوع میں کمی سے انسانی کا معیار زندگی متاثر ہو سکتا ہے۔رپورٹ کے مطابق گذشتہ ایک دہائی میں یورپ اور وسطی ایشیا میں زمین پر بسنے والے جانوروں اور پودوں میں 42 فیصد کمی آئی ہے۔
یہ اعداد و شمار دنیا کے آخری نر شمالی سفید گینڈے کی موت کے بعد سامنے آئے ہیں۔ان تاریک انکشافات کے باوجود تحقیق میں کئی جنگلی حیات میں کامیاب اضافے کی جانب بھی اشارہ کیا گیا ہے۔انٹرگورنمنٹل سائنس پالیسی پلیٹ فام آف بائیوڈائیورسٹی ایںڈ ایکوسسٹم سروسز (آئی پی بی ای ایس) کے مطابق چین اور شمالی مشرقی ایشا میں 1990 اور 2015 کے درمیان برساتی جنگلوں میں 20 فیصد اضافہ دیکھا گیا ۔تحقیق سے یہ بھی سامنے آیا کہ ماضی میں معدومی کا شکار ہونے رہنے والے آمور تیندوے کی آبادی میں بھی اضافہ ہوا اس تحقیق میں دس ہزار سے زائد سائنسی مضامین کا جائزہ لیا گیا اور اسے 2005 کے بعد حیاتی نظام پر سب سے جامع تحقیق کہا جا رہا ہے۔خوراک اور پانی کے حوالے سے لاحق خطرات میں آلودگی، موسمی تبدیلی اور جنگلات کا کٹاؤ سر فہرست ہیں۔سائنسدانوں کا کہنا تھاکہ حکومتیں، کاروبار اور انفرادی طور پر افراد جب کھیتی باڑی، ماہی گیری، جنگلات، کان کنی یا انفراسٹرکچر کی تعمیر کے حوالے سے فیصلے کریں تو وہ ان کے حیاتی نظام پر اثرات کو بھی ضرور ملحوظ خاطر رکھیں۔
