اسلام آباد(آئی این پی ) سپریم کورٹ نے نقیب اللہ از خود نوٹس کیس میں جے آئی ٹی کو جلد تفتیش مکمل کرنے کا حکم دیتے ہوئے کیس نمٹا دیا، را ئو انوار کے خلاف توہین عدالت کی کارروائی ختم اور بینک اکا ئو نٹس بحال کرنے کا حکم دیدیا ۔ جمعرات کو سپریم کورٹ نے نقیب اللہ از خود نوٹس کیس کا 4 صفحات پر مبنی تفصیلی فیصلہ جاری کرکے کیس نمٹا دیا۔عدالتی فیصلے میں کہا گیا ہے کہ را ئو انوار کے خلاف توہین عدالت کی کارروائی ختم کردی گئی ہے۔

عدالت نے را ئو انوار کے بینک اکا ئو نٹس بحال کرنے کا حکم دیا ہے جب کہ نادرا کو ان کا بلاک شناختی کارڈ بھی بحال کرنے کی ہدایت کی گئی ہے۔سپریم کورٹ نے رائو انوار سے تفتیش کے لیے بنائی گئی مشترکہ تحقیقاتی ٹیم کو جلد تفتیش مکمل کرنے کی ہدایت کی ہے اور حکم دیا ہے کہ جے آئی ٹی بغیر کسی دبا ئواور میڈیا کی خبروں سے مبرا ہوکر قانون کے مطابق شفاف تحقیقات کرے۔عدالت نے تفتیش تک را ئوانوار کا نام ایگزٹ کنٹرول لسٹ میں شامل رکھنے کا حکم دیا ہے جب کہ تحقیقات تک سندھ پولیس کو ملزم کی حفاظت کا ذمہ دار ٹھہرایا ہے۔