لاہور ( این این آئی) احتساب عدالت نے آشیانہ اقبال کیس میں گرفتار سابق ڈائریکٹر جنرل لاہور ڈویلپمنٹ اتھارٹی احمد چیمہ سمیت 6ملزمان کو مزید تفتیش کیلئے 3اپریل تک جسمانی ریمانڈ پر قومی احتساب بیورو ( نیب ) کے حوالے کر دیا ۔ نیب کی جانب سے آشیانہ ہاؤسنگ سکیم سکینڈ میں گرفتار سابق ڈی جی ایل ڈی اے احد چیمہ، نجی کمپنی کے مالک شاہد شفیق اور دیگر 4 ملزمان ،چیف انجینئر ایل ڈی اے اسرار سعید، بلال قدوئی، پی ایل ڈی سی کے 2 افسران امتیاز حیدر اور عارف مجید بٹ کو گزشتہ روز سخت سکیورٹی میں

احتساب عدالت پیش کیا گیا۔ نیب کے تفتیشی افسر نے اپنے دلائل میں کہا کہ احد چیمہ نے آشیانہ ہاؤسنگ سکیم میں فراڈ کیا اور اختیارات کا ناجائز استعمال کیا۔ تفتیشی افسر نے بتایا کہ شاہد شفیق نے جعلی دستاویزات سے کنٹریکٹ حاصل کیے جبکہ دیگر ملزمان نے بھی آشیانہ سکیم سکینڈل میں بے ضابطگیوں کیں۔لہٰذا استدعا ہے کہ ان سے مزید تفتیش کے لئے جسمانی ریمانڈ دیا جائے ۔ جس پر احتساب عدالت نے دلائل سننے کے بعد فیصلہ محفوظ کر لیا اور بعد ازاں فیصلہ سناتے ہوئے احد چیمہ سمیت تمام 6 ملزمان کا 3 اپریل تک جسمانی ریمانڈ پر نیب کے حوالے کر دیا تاکہ تفتیش کو مزید آگے بڑھایا جا سکے۔