کراچی(سی پی پی) پاکستان تحریک انصاف کے چیرمین عمران خان نے بلاول بھٹو پر طنز کرتے ہوئے کہا ہے کہ بے بی بلاول اپنے والد سے پوچھیں بغیر محنت ارب پتی کیسے بن گئے،بلاول بھٹو بتائیں 10سال کراچی میں پیپلزپارٹی کی حکومت رہی لیکن عوام کو صاف پانی تک نہیں دے سکے، پی پی نے سندھ میں کیا تبدیلی لائی گئی؟ چیف جسٹس سپریم کورٹ نے کراچی کی گندگی اٹھانے کیلئے ایک ہفتے کا وقت دیا ہے۔تفصیلات کے مطابق
پی ٹی آئی چیئرمین عمران خان دو روزہ دورے پر کراچی پہنچ گئے اس موقع پر کارکنوں کی بڑی تعداد نے ان کا استقبال کیا۔ اس موقع پر میڈیا سے گفتگو کرتے ہوئے عمران خان نے کہا کہ چیف جسٹس کی جانب سے کراچی کے حالات پر بنائی گئی کمیٹی کی رپورٹ کے مطابق کراچی میں پینے کے پانی میں سیوریج کا پانی ملا ہوا ہے، شہر میں ساڑھے650 مقامات ہیں جہاں سے کھیتوں کو پانی دیا جارہا ہے ان میں سیوریج کا پانی ملا ہے۔عمران خان نے کہا کہ بلاول بڑے بڑے بیانات دیتے ہیں،بے بی بلاول سے پوچھنا چاہتا ہوں 10 سال کراچی میں آپ کی حکومت رہی، لیکن آپ کراچی والوں کو پانی بھی نہیں دے سکے، دس سال میں کراچی اور اندرون سندھ میں کوئی ایک چیز بتائیں جو آپ نے ٹھیک کی ہو،کراچی کے لوگوں کی بنیادی ضروریات پوری نہیں کی گئیں۔انہوں نے مزید کہا کہ بلاول اپنے والد آصف زرداری سے پوچھیں کہ بغیر محنت کئے وہ کیسے ارب پتی بن گئے، یہ بتائیں 10سال میں پیپلز پارٹی نے کون سی بنیادی ضروریات پوری کیں۔انہو ں نے کہا کہ کراچی میں پینے کے پانی میں سیوریج کا پانی ملا ہوا ہے، چیف جسٹس سپریم کورٹ نے کراچی کی گندگی اٹھانے کیلئے ایک ہفتے کا وقت دیا ہے پہلے کراچی کا گند صاف کریں۔
