لاہور( این این آئی)یکم مارچ کو سینیٹ کے ضمنی انتخاب میں حکمران جماعت کے 13ووٹ ضائع ہونے کے باعث گزشتہ روز ہونیوالے سینیٹ انتخابات میں گروپ لیڈرز اراکین اسمبلی کو ووٹ کاسٹ کرنے کی بار بار پریکٹس کراتے رہے ۔
صوبائی وزراء اپنے اپنے گروپ میں شامل اراکین خصوصاً پہلی مرتبہ سینیٹ انتخاب کیلئے ووٹ کاسٹ کرنے والوں کو ووٹ ضائع ہونے کی وجہ بننے والی غلطیوں بارے پیشگی آگاہ کرتے ہوئے انہیں بار بار پریکٹس کراتے رہے ۔وزیر اعلیٰ پنجاب محمد شہباز شریف طبیعت کی ناسازی کے باوجود ووٹ ڈالنے کے لئے پنجاب اسمبلی آئے ۔ وزیر اعلیٰ شہباز شریف تقریباً دس منٹ تک پنجاب اسمبلی میں موجود رہے اور ووٹ ڈالنے کے فوری بعد واپس روانہ ہو گئے ۔شہباز شریف نے کہا کہ سینیٹ الیکشن کے بروقت انعقاد سے طوطا فال نکالنے والوں کو مایوسی ہوئی ہے۔سینیٹ الیکشن کے انعقاد سے جمہوری اداروں کو تقویت ملی ہے۔ یاد رہے کہ شہباز شریف یکم مارچ کو سینیٹ کے ضمنی انتخاب میں ووٹ کاسٹ کرنے کیلئے بھی اسمبلی آئے تھے۔سینیٹ انتخابات کے لئے پنجاب اسمبلی میں ہونے والی پولنگ کے دوران صوبائی وزیر قانون رانا ثنا اللہ خان نے سب سے پہلے اپنا ووٹ کاسٹ کیا ۔ رانا ثنا اللہ خان جو سینیٹ انتخابات میں اپنی جماعت کی جانب سے نگران کا کردار بھی ادا کر رہے تھے گروپ لیڈرز سے اراکین اسمبلی کی آمد بارے بھی پوچھتے رہے ۔
