لاہور( این این آئی) صوبائی وزیر قانون و پارلیمانی امور رانا ثناء اللہ خاں نے کہا ہے کہ نوازشریف کا نام اور وابستگی خوشبو کی طرح جسموں میں رچ بس چکی جو کسی آمریت یا فیصلے سے ختم نہیں ہو سکتی ، سپریم کورٹ کے ججز اور انکے فیصلے ہمارے لئے قابل احترام ہیں لیکن ان فیصلوں پر ایمان نہیں لا سکتے ۔ سینیٹ انتخابات کے موقع پر پنجاب اسمبلی کے احاطہ میں میڈیا سے گفتگو کرتے ہوئے انہوں نے کہا کہ مسلم لیگ (ن) نے سینیٹ الیکشن میں ایسا کوئی کام نہیں کیا جسے ہارس ٹریڈنگ قرار دیا جاسکے۔
انہوں نے کہا کہ سپریم کورٹ کے فیصلے قانون اور آئین کی تشریح کرتے ہیں لیکن یہ عوامی رائے نہیں ہو سکتے ۔ عوامی فیصلے کسی ضابطے اور آمریت کے پابند نہیں ہوتے ۔ مسلم لیگ (ن) کے امیدواروں سے ان کی پارٹی کا نام چھینا گیا ہے لیکن نواز شریف سے وابستگی خوشبو کی طرح ہمارے جسموں میں رچ بس چکی ہے ، وہ کسی آمر کی آمریت سے ختم ہوئی اور نہ ہی کسی فیصلے سے ختم ہوسکتی ہے ۔ سپریم کورٹ کے ججز اور ان کے فیصلے ہمارے لئے قابل احترام ہیں لیکن ان کے فیصلوں پر ایمان نہیں لا سکتے۔انہوں نے کہا کہ (ن) لیگ کے ووٹرز اور سپورٹرز جانتے ہیں ن) لیگ نوازشریف نے قوم کی خدمت کی جس کا صلہ ضرور ملے گا۔
