اسلام آباد (مانیٹرنگ ڈیسک)سینٹ انتخابات میں پولنگ کا عمل جاری ہے اور اراکین اسمبلی ووٹ پول کر رہے ہیں۔ اسی دوران پی ٹی آئی کے رکن خیبرپختونخواہ اسمبلی جاوید نسیم کے ووٹ پول کرنے کے دوران ان سے کیمرہ پین برآمد کر لیا گیا ہے۔جاوید نسیم جب ووٹ پول کرنے کیلئے آئے تو الیکشن کمیشن کی جانب سے متعین عملے نے ان سے کیمرہ پین برآمد کر کے ضبط کر لیا ہے۔
الیکشن کمیشن حکام کا کہنا ہے کہ اراکین اسمبلی ووٹنگ کے دوران کیمرہ پین کا استعمال نہیں کر سکتے۔واضح رہے کہ الیکشن کمیشن کی جانب سے سینٹ الیکشن کیلئے ضابطہ اخلاق جاری کیا گیا تھا جس میں اراکین اسمبلی کو ہدایت کی گئی تھی کہ وہ اپنے ساتھ کیمرے والے موبائل فون اور کوئی ایسی چیز نہیں لا سکتے جس سے ان کے ووٹ کا عکس حاصل یا محفوظ کیا جاسکے۔
