اسلام آباد(آن لائن) خیبرپختونخوا کی صوبائی حکومت کی ایجوکیشنل ریفارمز نے وفاق سمیت دیگر صوبوں پر برتری حاصل کر لی ۔ فیڈرل بورڈ آف انٹرمیڈیٹ اینڈ سکینڈری ایجوکیشن کی طرف سے جاری اعلامیہ میں الحاق شدہ اداروں سمیت ملک بھر میں خیبرپختونخوا ٹیکسٹ بک بورڈ پشاور کے نصاب کو پڑھانے کی ہدایات جاری کر دی ہیں ۔
تفصیلات کے مطابق 27 فروری کو وفاقی تعلیمی بورڈ کے ڈائریکٹر رشیدہ ذوالفقار علی رضوی کی طرف سے ملک بھر کے تعلیمی اداروں کے نام جاری مراسلے میں کہا گیا جبکہ میٹرک و انٹرمیڈیٹ لیول پر خیبرپختونخوا ٹیکسٹ بورڈ پشاور کے نصاب کو پڑھایا جائے۔وفاقی تعلیمی بورڈ کی طرف سے جن تعلیمی اداروں کو کے پی کے ٹیکسٹ بک بورڈ پشاور کا نصاب بڑھانے کی تلقین کی گئی ہے ان میں فیڈرل بورڈ آف انٹرمیڈیٹ اینڈ سکینڈری ایجوکیشن اسلام آباد سے الحاق شدہ تمام اداروں سمیت ڈائریکٹر جنرل وفاقی نضامت تعلیمات ، ڈائریکٹر جنرل فیڈرل گورنمنٹ ایجوکیشنل انسٹیٹیوشنز ، ڈائریکٹر جنرل سکولز اینڈ کالجز پی اے ایف ، ڈائریکٹر ایجوکیشن ڈائریکٹوریٹ آف نیول ایجوکیشنل سروسز ، ڈائریکٹر آرمی پبلک سکولز اینڈ کالجز سسٹم سیکرٹریٹ ، جنرل منیجر ایجوکیشن فوجی فاؤنڈیشن ، ڈائریکٹر جنرل او پی ایف ، ممبر کے پی پی ٹیکسٹ بک بورڈ پشاور اور وفاقی تعلیمی بورڈ کے ریجنل افسر شامل ہیں ۔
