کراچی (مانیٹرنگ ڈیسک) پاکستان پیپلزپارٹی کے چیئرمین بلاول بھٹوزرداری نے شہباز شریف اور عمران خان کو کراچی سے الیکشن لڑنے کا چیلنج دیتے ہوئے کہا ہے کہ ( ن) لیگ نے متنازع شخصیت کو پارٹی صدر بنایا ،شہباز شریف کو ماڈل ٹاؤن میں قتل عام، ملتان میٹرو اور آشیانہ کرپشن اسکینڈل میں جواب دینا ہے، عوام کو اس سے کوئی غرض نہیں کہ نوازشریف کو کیوں نکالا۔ عمران خان طالبان کی اوقاف فنڈ سے مدد کررہے ہیں جو کے پی کے میں دہشتگردی کا سبب بنے گا۔میموگیٹ اسکینڈل ایک جھوٹا کیس تھا ۔
پاناما کس سے توجہ ہٹانے کے لیے نوازشریف میمو گیٹ کے اسکیڈل کو زندہ کررہے ہیں ۔ان خیالات کا اظہار انہوں نے بدھ کو کراچی میں ممبر سازی مہم کے دوران میڈیا س بات چیت کرتے ہوئے کیا ۔بلاول بھٹو زرداری نے کہا کہ پیپلزپارٹی واحد جماعت ہے جو عوامی مسائل حل کر سکتی ہے، جس کی وجہ یہ ہے کہ پیپلزپارٹی عدالت اور پارلیمنٹ کے بجائے ہمیشہ عوام کے ساتھ کھڑی ہوتی ہے۔چیئرمین پیپلز پارٹی نے میوگیٹ اسکینڈل کو جھوٹا کیس قرار دیتے ہوئے الزام عائد کیا کہ پاناما کیس سے توجہ ہٹانے کیلئے نواز شریف میمو گیٹ اسکینڈل کو زندہ کر رہے ہیں۔ سب جانتے ہیں کہ میمو گیٹ جعلی کیس تھا۔بلاول بھٹو نے کہا کہ پنجاب حکومت نے ماڈل ٹاون میں بیگناہ افراد کو نشانہ بنایا، مسلم لیگ ن کو کسی متنازع شخص کو پارٹی صدر نہیں بنانا چاہئے تھا۔انہوں نے کہا کہ عمران خان اور شہبازشریف کو دعوت ہے کہ آئیں کراچی سے الیکشن لڑیں، کراچی کے عوام صرف پیپلزپارٹی کوکامیاب کرائیں گے۔بلاول بھٹو نے کہا کہ پیپلزپارٹی عوامی رابطہ مہم چلا رہی ہے، پی پی ہی واحد جماعت ہے جو عوام کے مسائل حل کرسکتی ہے، عوام بیروزگاری، مہنگائی اور دہشت گردی کا خاتمہ چاہتے ہیں، ملک کو خوش حال اور پرامن بنائیں گے۔ایک سوال کے جواب میں چیئرمین پیپلزپارٹی کا کہنا تھا کہ میڈیا کو آزاد ہونا چاہئے، پابندیاں اچھی چیزنہیں۔انہوں نے کہا کہ عوام کو مجھے کیوں نکالا سے کوئی غرض نہیں۔عوام کا مسئلہ بیروزگاری، غربت اور دہشتگردی ہے جس کا حل صرف پیپلز پارٹی کے پاس ہی موجود ہے۔ انہوں نے کہا کہ عمران خان طالبان کی اوقاف فنڈ سے مدد کررہے ہیں جو کے پی کے میں دہشتگردی کا سبب بنے گا۔ انہوں نے دعوی کیا کہ آئندہ وزیراعظم، وزیر خارجہ اور وزرائے اعلی پیپلز پارٹی سے ہوں گے۔بلاول بھٹو کا کہنا تھا کہ پارٹی قائدین، رہنما اور کارکنان اگلے الیکشن کیلئے بھرپور تیاری کریں اور پارٹی کا پیغام ملک کے کونے کونے تک پہنچائیں۔
