لاہور(مانیٹرنگ ڈیسک) سابق وزیراعظم محمد نوازشریف نے پاکستان مسلم لیگ(ن) کی مرکز ی مجلس عاملہ کے اجلاس میں وزیراعلی پنجاب محمد شہبازشریف کی کارکردگی کی تعریف کرتے ہوئے کہا کہ میں شہبازشریف کو شاباش دینا چاہتا ہوں جن کی سربراہی میں پنجاب میں بے شمار ترقیاتی کام ہورہا ہے ۔اگر 22ماہ کی تاخیر نہ ہوتی تو آج لاہور اورنج لائن میٹروٹرین چل رہی ہوتی اورعوام اس پر سفر کررہے ہوتے۔انہوں نے کہا کہ پنجاب کے وزیراعلیٰ محمد شہبازشریف نے شاندار کارکردگی کا مظاہرہ

کیا اوریہ کارکردگی ان کے دامن پر ایک خوبصورت نشان ہے ۔لاہور ایک ترقی یافتہ شہر نظر آتا ہے ،اسی طرح ملتان میں بھی میٹرو بسیں چل رہی ہے۔ شہبازشریف نے اپنی نمایاں کارکردگی کے ذریعے خاص مقام بنایا ہے ۔وزیراعلیٰ پنجاب محمد شہبازشریف جب اپنی تقریر ختم کر کے اپنی نشست پر آئے تو محمد نوازشریف نے انہیں گلے لگا کر مبارکباد دی اوران کی ستائش کی ۔مریم نواز بھی اپنی نشست سے اٹھ کر سٹیج پر آئی اورشہبازشریف کو پارٹی کا قائم مقام صدر منتخب ہونے پر مبارکباد دی۔

موضوعات:نوازشریف