اسلام آباد(نیوز ڈیسک)مری کے نواحی علاقے بروری میں 2 مسلح گروپوں میں زمین کے تنازعہ پر تصادم کے نتیجے میں ایک شخص جاں بحق ہو گیا ہے جبکہ اندھادھند فائرنگ کے نتیجے میں دونوں گروپوں کے 8 افراد زخمی ہو گئے ہیں جنہیں فوری طور پر قریبی ہسپتال منتقل کردیا گیا ہے ۔ 3 زخمیوں کی حالت تشویشناک ہے میڈیا رپورٹس کے مطابق اتوار کے روز مری کے نواحی علاقے تھانہ مری کی حدود میں مری بروری میں زمین کے تنازعہ پر دو گروپوں میں شدید تصادم اس وقت ہوا جب ایک گروپ پہلے سے زمین پر قبضے کے لئے موجود تھا تو دوسرے گروپ نے اندھادھند فائرنگ کر دی جس کے نتیجے میں ایک شخص موقع پر جاں بحق ہو گیا جبکہ دونوں گروپوں کے درمیان فائرنگ کا سلسلہ کا فی دیر تک جاری رہا جس کے نتیجے میں دونوں گروپوں کے 8 افراد زخمی ہو گئے ۔ فائرنگ کی آواز سنتے ہی علاقہ مکینوں کی بڑی تعداد موقع پر پہنچ گئی اور مسلح گروپوں کے درمیان تصادم کو رکوانے کی کوشش کی اور ان کو منتشر کیا ۔ جس کے بعد نعش اور تمام زخمیوں کو ہسپتال منتقل کر دیا گیا ۔ پولیس کے مطابق ایک شخص موقع پر جاں بحق ہو گیا ہے جبکہ 8 زخمیوں کو ہسپتال منتقل کر دیا گیا جس میں 3 کی حالت تشویشناک بتائی جا رہی ہے تصادم زمین کے معمولی تنازعہ کے نتیجے میں ہوا ۔