لاہور( آن لائن )سابق ٹیسٹ کرکٹر اور لاہور قلندرز کے کوچ عاقب جاوید نے نوجوان فاسٹ باؤلر سلمان ارشاد کی تعریف میں زمین و آسمان ایک کرڈالے۔ عاقب جاوید کا کہنا تھا کہ انہوں نے جیسے ہی سلمان ارشادکو لاہور قلندرز کے ٹیلنٹ ہنٹ پروگرام میں باؤلنگکرتے دیکھا تو سمجھ گیا کہ اس میں پاکستان کے لیے بہت کچھ کرنے کا پوٹینشل موجود ہے ،میں نے انہیں ٹرائلز میں 145کلو میٹر فی گھنٹہ کی رفتار سے باؤلنگ کرتے دیکھا
اور منتخب کرنے کا فیصلہ کرلیا،اس کو تلاش کرنا کسی خواب کے پور ا ہونے کے مترادف تھا۔عاقب جاوید کا مزید کہنا تھا کہ تھوڑی سے محنت اور ٹریننگ کے بعد سلمان 150کلو میٹر فی گھنٹہ کی رفتار سے بھی باؤلنگ کرسکیں گے ،کشمیر سے باؤلر کو منتخب کرنا نہ صرف لاہور قلندرز بلکہ پاکستان سپر لیگ کے لیے بھی اعزاز کی بات
ہے۔ لاہور قلندرز کے کوچ کا کہنا تھا کہ ہم ایسا ہی باؤلر چاہتے تھے جس کے پاس رفتار ہو اور وہ اس علاقے کے لوگوں کا مائنڈ سیٹ بدل سکے۔22سالہ سلمان ارشاد کو لاہور قلندرز نے 21ویں کھلاڑی کے طور پر اپنے سکواڈ میں شامل کیا ہے ، وہ ان دنوں آسٹریلیا میں ہاکسبری سی سی کی جانب سے گریڈ ٹو کرکٹ کھیل رہے ہیں۔
