اسلام آباد (مانیٹرنگ ڈیسک) متحدہ عرب امارات نے سعودی عرب پر برڈ فلو وائرس ایچ فائیو این ایٹ کے کیسز سامنے آنے پر پولٹری مصنوعات درآمد کرنے پر پابندی لگا دی ہے۔ تفصیلات کے مطابق متحدہ عرب امارات نے برڈ فلو کی اطلاعات پر سعودی عرب سے پرندے اور ہر قسم کی پولٹری مصنوعات درآمد کرنے پر پابندی لگا دی ہے۔عرب میڈیا کا کہنا ہے کہ دبئی حکام نے یہ پابندی ریاض میں برڈ فلو وائرس ایچ فائیو این ایٹ کے کیسز سامنے آنے کی وجہ سے لگائی ہے اور اس پابندی
کے تحت سعودی عرب سے تمام اقسام کے مقامی اور جنگلی پرندے، زندہ مرغیاں، مرغی کا گوشت، انڈے اور ان سے بنی غذائی اشیاء متحدہ عرب امارات لانے پر پابندی ہو گی۔ سعودی وزارت ماحولیات کا کہناہے کہ ورلڈ آرگنائزیشن آف اینیمل ہیلتھ کی نشاندہی کے بعد یہ قدم اٹھایا گیا ہے، اس سلسلے میں آرگنائزیشن کا کہنا ہے کہ ریاض میں 14 پرندوں کو ایچ فائیو این ایٹ وائرس میں مبتلا ہونے کی وجہ سے ہلاک کیا گیا لیکن یہاں اطلاعات ہیں کہ ہزاروں پرندوں میں یہ وائرس موجود ہے۔
